नेपालगन्ज १७ मंसिर : छिमेकी भारतमा समेत कोरोना भाइरसको ओमिक्रोन भेरियन्ट फेला परेका बेला नेपालका स्वास्थ्यमन्त्रीले उक्त भेरियन्टलाई नेपाल आउन नदिन ‘आवश्यक सबै उपायहरू अपनाइएको’ बताएका छन् ।
उनका भनाइमा नयाँ भेरियन्टलाई समेत दृष्टिगत गर्दै खोप अभियानलाई सरकारले ‘अझ सशक्त, लक्षित समूहमुखी र तीव्र’ पार्न लागेको छ । स्वास्थ्य तथा जनसङ्ख्यामन्त्री विरोध खतिवडाका अनुसार सरकारले अहिलेलाई हङ्कङसहित अन्य आठ देशबाट आउने यात्रुलाई नेपाल प्रवेशमा रोक लगाएको छ ।
नयाँ भेरियन्टको खतरा बढेको भन्दै सरकारले शुक्रबारबाटै हङ्कङसहित अन्य आठ मुलुकबाट नेपाल आउने यात्रुलाई प्रवेशमा रोक लगाइसकेको जानकारी उनले दिए ।
त्यस्तै भारतमा समेत ओमिक्रोन भेरियन्ट देखा परिसकेकाले विभिन्न सीमानाकामा १६ वटा हेल्थ डेस्क राखेर एन्टिजन परीक्षण र मानिसहरूलाई क्वारन्टिनमा पठाउने व्यवस्था गरिएको उनले बताए ।
सरकारले प्रवेश रोकिएका देशहरूमा ट्रान्जिट परेका यात्रुहरूलाई कसरी व्यवस्थापन गर्ने भन्नेबारे पनि काम अघि बढाइसकेको खतिवडाको भनाइ छ ।
त्यस्तै शङ्का लागेका व्यक्तिलाई विशेष निगरानी गरेर थप परीक्षण गरी त्यो ओमिक्रोन भेरियन्ट हो किन हैन भन्ने पत्ता लगाउने काम पनि गर्न लागिएको स्वास्थ्यमन्त्रीले बताए । आवश्यक परेमा अन्य देशहरूबाट आउने यात्रुलाई पनि प्रतिबन्ध लगाइने तथा नेपालभित्रै लकडाउनसहित विभिन्न उपाय अपनाउनुपर्ने अवस्था पनि आउन सक्ने उनको भनाइ छ ।
नयाँ भेरियन्टलाई हुने खालका औषधि वा खोप बन्यो र त्यसलाई विश्व स्वास्थ्य सङ्गठनले मान्यता दियो भने नेपालले विशेष प्राथमिकता दिएर किन्ने उनले बताएका छन् । तर, नेपालमा अहिले कोभिडबाट बच्ने उपायहरू अपनाउन धेरैले छाडेको भन्दै स्वास्थ्यमन्त्रीले भने, ‘अहिले नेपालमा लापरबाही बढेको छ । म सबैलाई लापरबाही नगरी कोभिडबाट बच्ने उपायहरू अपनाउन र होसियार हुन आग्रह गर्छु ।’
यसैबीच स्वास्थ्य तथा जनसङ्ख्या मन्त्रालयले सार्वजनिक गरेको विवरणअनुसार हालसम्म नेपालको कुल जनसङ्ख्यामध्ये ३३.३ प्रतिशतले कम्तीमा एक मात्रा खोप लगाइसकेका छन् । पूर्ण मात्रा खोप लगाउनेहरू भने २८.२० प्रतिशत छन् । तर, खोप दिनयोग्य जनसङ्ख्यामा हिसाब गर्ने हो भने यो विवरण निकै उच्च हुन जान्छ ।
गत माघमा खोप अभियान सुरु भएयता बिहीवारसम्म नेपालमा एक करोड ८६ लाखभन्दा बढी मात्रा खोप खपत भइसकेको छ । स्वास्थ्य सेवा विभागको जानकारीअनुसार अहिले केन्द्र र प्रदेश वितरण केन्द्रहरूमा समेत रहेको गरी नेपालमा करिब ५० लाख मात्रा खोप मौज्दात छ ।
नेपालमा अहिले पनि १८ वर्षमाथिका सबैलाई खोप लगाउने अभियान सञ्चालन भइरहेको छ । केही साताअघि सीमित मात्रामा १२ वर्षमाथिका बालबालिकालाई पनि फाइजर खोप दिइएको थियो ।
शुक्रवार पनि कोभ्याक्स सुविधाअन्तर्गत नेपालमा मोडेर्नाको एक लाख ८८ हजार मात्रा खोप आउन लागेकोछ । उक्त खोप पनि फाइजरजस्तै १२ वर्षमाथि उमेरकालाई दिन मिल्ने बताइएको छ ।
माइनस १५ देखि २५ डिग्री सेल्सीअसमा भण्डारण गर्नुपर्ने उक्त खोप कसलाई र कुन क्षेत्रमा लगाइदिने भन्ने तय भइनसकेको बताइएको छ ।