नेपालगन्जः नेपालगन्ज मेडिकल कलेजका सह–निर्देशक डाक्टर नितेश कनोडियाले कोरोनाबाट मृत्यु भएका बाँके नरैनापुरका युवकको घर बनाइदिन एक लाख रुपैयाँ सहयोग गरे ।

कोरोनाको हटस्पट नरैनापुरमा नेपालगन्ज मेडिकल कलेजका सह–निर्देशक डाक्टर कनोडिया स्वयम पुगेर चार सय ३९ परिवारलाई राहात स्वरुप विभिन्न खाद्यान्न सामाग्री प्रदान गरे । तर, मेडिकल कलेजले घर बनाइदिने भएपछि सोही मेडिकल कलेजमा कार्यरत कर्मचारीहरू तलब नपाएर भोकभोकै बस्नुपरेकोछ । 

एकातिर सामाज सेवा गरेर चर्चा कमाउन तल्लिन डाक्टर कनोडिया आफ्नै धरातल बिर्सेर कर्मचारीलाई भोकै राख्दै आएकाछन् । कोरोना भाइरस संक्रमणका कारण देश बन्दाबन्दि छ । जसका कारण सिर्जित असहज परिस्थीतिमा आफ्नो ज्यान जोखिममा राखेर काम गर्दै आएका कर्मचारीले खाइपाइ आएको तलब समेत पाएका छैनन् ।

नेपालगन्ज मेडिकल कलेजमा कार्यरत कर्मचारीको तलब समयमै प्रदान गर्नु त परको कुरा उनले कोरोनाको महामारिका बेला यसअघि खाइपाइ आएको तलबभत्ता समेत कटौती गरि सामाजिक कार्यमा लगाइरहेकाछन् ।

आफ्नै कर्मचारीको रकममा रजाई गर्ने नेपालगन्ज मेडिकल कलेजका सह–निर्देशक डाक्टर नितेशको गैरजिम्मेवारीका कारण अस्पतालमा कार्यरत सयौं कर्मचारीले सास्ती भोग्नु परेकोछ ।

यसअघि अस्पतालका कर्मचारीले १३ महिनाको तलब पाउने गरेको मेडिकल कलेजका कर्मचारी बताउँछन् । अस्पतालका एक कर्मचारीले भने–‘आन्तरिकरुपमा एक महिनाको तलब नदिनु भनेर उर्दी जारी भएको छ । अब कर्मचारी सबैले १२ महिनाको मात्र तलब पाउँछन् ।’ उनले थपे–‘महिनादिन वित्दा पनि समयमै तलब पाइदैन अब त तलब घटेर आयो ।’

आफ्नै कर्मचारीको श्रम शोषण गर्ने कनोडियाको यतिबेला चर्को आलोचना भइरहेकोछ । ‘घर बनाइदिनु सह्रानीय काम हो तर, आफ्नै घरको परिवार भोकै हुँदा घरका परिवारलाइ पहिला प्राथमिकता दिँदा राम्रो हुन्थियो ?’ अर्का एक कर्मचारीले गुनासो पोखे ।

नाम उल्लेख नगर्ने सर्तमा मेडिकल कलेजका कर्मचारीले भने ‘हामीले दुइ महिनादेखी तलब पाएका छैनौ । अनि मेडिकल कलेजले मृतकका लागि घर बनाइदिदै छ । पैसा बाँड्दै हिँडेको छ । यो हामी माथि अन्याय हो ।’ उनले थपे–‘डाक्टर साबले सामाजिक कार्य गर्न पाउनुपर्छ तर, हामी कर्मचारीको तलबबाट होइन ।’

‘कि त कनोडियाले आफ्नो गोजीबाट रकम खर्च गरि राहत वितरण गर्नुप¥यो, मेडिकल कलेजको नाम राख्नु भएन’ एक कर्मचारीले भने– ‘होइन भने हामीलाई भोकै राखेर मेडिकल कलेजको तर्फबाट राहत बाँड्न पाइदैन ।’

मृतकका आफन्तलाइ घर र पैसा सहयोग गर्दै हिँड्ने प्रबन्धकको अस्पतालमा काम गर्ने चिकित्सहरूले समेत लामो समयदेखि तलब भुक्तानी पाएका छैनन ।

अझ कोरोना भाइरस विशेष कार्यक्रममा खटिने साना कर्मचारीको तलब भत्ता आफूखुसी कटौती गरिरहेकोछ । अस्पतालका एक कर्मचारीले भने–‘विदा नबस्दा पनि विदा बसालिन्छ, विदा बसेको दिनको तलबभत्ता काटिन्छ । यो कस्तो नियम हो ।’

अझ पछिल्लो समय नेपालगन्ज मेडिकल कलेजले मोटो रकम असुल्ने बहानामा स्वास्थ्यसगं खेलवाड गरिरहेको तथ्य बाहिरीएकोछ । कोरोना भाइरसको महामारीका बेला उपचारका लागि आउने बिरामीहरुको कोरोन जाँच नगरी भर्ना लिदाँ आफुहरु असुरक्षित भएको कर्मचारीको गुनासो छ । बाहिर समाजसेवा गर्दै हिँड्ने मेडिकल कलेज र अस्पतालका सह–निर्देशक नितेश कनोडियाले भने आफ्नै संस्था भित्रका कमीकमजोरीलाइ मध्यनजर गर्न सकेका छैनन् । नेपालगन्ज मेडिकल कलेजका सह निर्देशक डा.कनोडियालाई पटक पटक सम्पर्क गर्दा सम्पर्क हुन सकेन । कार्यालयबाट गरेको फोनलाई कहिले त काटिदिए भने कहिले उठाएनन् ।