नेपालगन्ज २६ फागुन :

यहाँ जो आउँछन् मुटुभरि आगो, ओठभरि ज्वाला बोकेर आउँछन्
यहाँ जो बस्छन्, हत्केलाभरि खरानी र आँखाभरि धुवाँ बोकेर बस्छन् ।
,,,,
केटिएम सिटिमा अलिकति कपाल ठाडो, अलिकति मन साह्रो हुनैपर्छ ।
,,,,
तर, कहिले काँही चुरोट जलाउन कोरेको सलाईको काँटीले सहरका गल्लीहरु जल्दा रहेछन् ।
,,,,
एकै नजरमा सहरसंग माया त बस्यो, तर सहरको आँखा लाग्ला भन्ने कुरा मलाई के थाहा ?
,,,,

माथि भनिएका यी वाक्य अर्थात डायलग सुन्न र हेर्नका लागि तपाई होलीको भोलीपल्ट सिनेमा घर जानै पर्छ । किनकी यो डायलगमा जति अर्थपूर्ण शब्दहरु छन् उत्तिकै डायलग बोल्ने कलाकारको प्रस्तुती जिवन्त र यर्थाथ छ ।

होलीको अवसर पारेर प्रर्दशन हुन लागेको चलचित्र ‘चिसो एस्ट्रे’को ट्रेलरमा देखाइएका दृष्यमा बोलिएका यी डायलग यतिबेला चर्चामा छ । चर्चामा पनि किन नहोस् ७ वर्षको अवधि लगाएर निर्माण गरिएको नेपाली चलचित्र ‘चिसो एस्ट्रे’ले यतिबेला धमाकेदार प्रचारप्रसार गरिरहेकोछ ।

यही फागुन १३ गतेबाट देशव्यापी प्रदर्शनमा आएको सुदर्शन थापा निर्देशित चलचित्र ‘म यस्तो गीत गाउँछु २’ले धमाकेदार प्रस्तुती गरिरहेका बेला ‘चिसो एस्ट्रे’ प्रर्दशनीमा आउन लागेको हो ।

चलचित्र प्रर्दशनको मिति नजिकिएका बेला ‘चिसो एस्ट्रे’ टिमले आफ्नो प्रचारप्रसारलाई तिव्र पारेकोछ । कोरोना कहरकाबीच अस्तब्यस्त बनेको नेपाली सिनेजगत पुनः जुरमुराउन खोजेको बेला बुहप्रतिक्षाको रुपमा रहेको मध्ये एक चलचित्र ‘चिसो एस्ट्रे’ आगामी चैत्र ४ गते अल नेपाल रिलिज हुँदैछ ।

दिनेश पाल्पालीले निर्देशन गरेको यो चलचित्रले आधुनिक बन्न खोज्दा आफैंलाई गुमाउन खोजेको ठिटोको कथा उठाएको छ । चलचित्र ‘चिसो एस्ट्रे’को प्रचारप्रसारमा देशब्यापी दौडाहमा रहेको निर्देशक दिनेश पाल्पालीसहितको टोलीले बिहीबार नेपालगन्जमा पत्रकारबीच छलफल समेत गरेकोछ ।

पत्रकार छलफलका क्रममा बोल्दै निर्देशक दिनेशले कवि भूपी शेरचनले धेरै अघि नै काठमाडौंलाई ‘चिसो एस्ट्रे’को बिम्बको रुपमा प्रस्तुत गरेको बताउँदै आफू सोही विम्बबाट प्रभावित भएपछि यो चलचित्र निर्माण गरेको बताए ।

चलचित्रको प्रमोशनका लागि नेपालगन्ज आएका निर्देशक दिनेशका साथमा कलाकार दिव्य देव र नविन लम्सालसहित चलचित्रको मार्केटिङ्ग विशाख विक्रमको उपस्थिती रहेको थियो ।

फिल्मका अभिनेता दिव्य देवले फिल्म निर्माणका रोचक कथा सुनाउँदै आफूले गाउँबाट सहर आउने मदन नामको चरित्र निर्वाह गरेको जानकारी दिए । थिएटरबाट फिल्ममा आएका उनले कतिपय फिल्म गर्दा सहकर्मीबीच आत्मीयता स्थापित गर्ने मौका नपाएको स्मरण गर्दै यो फिल्ममा भने त्यो मौका पाएको र सम्पूर्ण सहकर्मीसँग परिवारको जस्तो सम्बन्ध स्थापित भएको स्मरण गरे ।

पत्रकारसंग छलफल गर्दै उनले अनुभव सुनाउँदै भने–‘यो फिल्ममा म ड्राइभरको भूमिकामा पनि छु । सुटिङ सेटमा यस्तो भयो कि म साथीहरू सबलाई घर–घर छाड्थेँ र आफू अन्तिममा घर जान्थेँ । यो रमाइलो फिल्ममा पनि देख्न सकिन्छ ।’

यस्तै अर्का अभिनेता नवीन लम्सालले फिल्ममा चुरोटलाई पनि ‘मेटाफोरिकल्ली’ पात्रको रूपमा राखेको बताए । ‘एउटा पात्र गाउँबाट काठमाडौं आएर कसरी ठिटो बन्ने चक्करमा चुरोटको ठुटो बन्छ भन्ने कथा फिल्ममा छ,’ उनले भने ।

पत्रकारबीच भएको छलफलमा चलचित्र निर्माणसंगै नेपाली चलचित्र क्षेत्रका बारेमा चर्चा गरिएको थियो । नेपालगन्ज आएको चलचित्र ‘चिसो एस्ट्रे’ टिम बिहीबार नै धनगढीका लागि गएकोछ ।

चलचित्र ‘चिसो स्ट्रे’मा दिव्य देव, नवीन लम्साल, निकुन श्रेष्ठ, सुशीलराज पाण्डे, रविन तामाङ, श्रृष्टि श्रेष्ठ लगायतका कलाकारको अभिनय छ ।

यही चैत ४ गतेबाट प्रदर्शन हुन लागेको चलचित्र ‘चिसो एस्ट्रे’ले यसअघि टिजर र ट्रेलर सार्वजनिक गरिसकेकोछ । फिल्ममा काठमाडौंको संघर्ष र गल्लीहरुका कथालाई देखाउन खोजिएको छ ।

कंगारु क्रिएसन र लोकल सिनेमाको संयुक्त ब्यानरमा निर्माण भएको यो चलचित्रलाई महेशबाबु तिमल्सिनाले प्रस्तुत गरेका हुन् । चलचित्रको निर्माणमा महेशबाबुलाई प्रविन स्याङ्बा र सुस्मिता पराजुलीले सघाएका छन् । यो चलचित्रमा दिनेशकै कथा छ । चलचित्रमा अजर जंगमको संगीत, उज्ज्वल बस्ताकोटीको छायांकन र उज्ज्वल ढकालको सम्पादन रहेकोछ ।

फिल्मलाई काठमाडौंमा रिच इन्टरटेनमेन्ट र जीजीए ग्रुपले वितरण गर्नेछ भने काठमाडौं बाहिर एफडी कम्पनीले वितरण गर्नेछ ।

हेर्नुहोस ‘चिसो एस्ट्रे’ को ट्रेलर