नेपालगन्ज :तोकिएको समयमै काम गर्न नसक्ने देखिएपछि निर्माणको जिम्मेवारी लिएको पप्पु–रसुवा कन्स्ट्रक्सनबाट रकम फिर्ता लिइएको छ ।

बाँकेमा निर्माणाधिन क्षेत्रीय कारागारको काम सन्तोषजनक नभएपछि निर्माण कम्पनीबाट पेश्की रकम फिर्ता गरिएको हो । निर्माण कम्पनीको तीन बर्षे ठेक्का सम्झौताको अवधी कात्तिक ४ गते सकिदैछ ।

हालसम्म चार प्रतिशत मात्रै काम भएपछि मोविलाईजेशन बापतको सात करोड ६ लाख फिर्ता गरिएको शहरी विकास तथा भवन निर्माण विभाग संघीय आयोजना ईकाई नेपालगन्जले जनाएको छ ।

बाँकेको नौवस्तामा कारागार निर्माणका लागि पप्पु–रसुवा कन्स्ट्रक्सनले ठेक्का पाएको थियो । तर सम्झौताको अवधी समाप्त हुने बेलासम्म ४ प्रतिशत मात्रै काम गरेपछि कार्यालयले मोविलाईजेशन बापत उपलब्ध गराएको सात करोड ६ लाख फिर्ता ल्याएको कार्यालय प्रमुख सुबास बस्नेतले बताए ।

५३ करोड कुल बजेट रहेकोमा पप्पु–रसुवा कन्स्ट्रक्सनले ३८ करोडमा ठेक्का सकार गरेको हो । क्षेत्रीय कारागारको क्षमता तीन हजारको रहेको छ ।