नेपालगन्ज : स्थानीय तहहरुको अधिक उदासिनताका कारण बाँके अझैपनि साक्षर जिल्ला घोषणा हुन सकेको छैन ।

यस जिल्लाका चार स्थानीय तहले जर्बरजस्ती तहलाई साक्षर घोषणा गरेका छन् । चार स्थानीय तहले अझै तथ्याक संकलन समेत गर्न सकेका छैनन् ।
कोहलपुर नगरपालिका, खजुरा, जानकी र नरैनापुर गाउँपालिकाले मात्र तहलाई साक्षर घोषणा गरेका छन् ।

नेपालगन्ज उपमहानगरपालिका, राप्तीसोनारी, डुडुवा, बैजनाथ गाउँपालिका अझै तथ्याक संकलनमै अड्किएका छन् । गत फागुनमै बाँकेलाई साक्षर जिल्ला घोषणा गर्ने भएपनि तहको लापरवाहीले अहिलेसम्म बाँके साक्षर हुन नसकेको शिक्षा अधिकारीहरु बताउँछन् ।

बाँकेलाई साक्षर जिल्ला घोषणा गर्न संघीय सरकारको शिक्षा, विज्ञान तथा प्रविधि मन्त्रालय र प्रदेश ५ को सामाजिक विकास मन्त्रालयले सहयोग गर्ने प्रतिबद्धता जनाएको थियो । तर, जिल्ला र स्थानीय तहमा तदारुकताका साथ काम नहुँदा समय पर धकेलिएको छ ।

उपमहानगरपालिकाको तथ्याक संकलनको काम अन्तिम चरणमा पुगेको शिक्षा शाखा प्रमुख गोर्खबहादुर थापा बताउँछन् । साक्षर जिल्ला घोषणा गर्न १५ देखि ६० वर्ष उमेरका ९० प्रतिशत मानिस साक्षर हुनैपर्छ । पूर्ण साक्षर जिल्ला घोषणा गर्न ९५ प्रतिशतभन्दा बढी नागरिक साक्षर हुनुपर्ने प्रावधान रहेको छ ।