नेपालगन्ज। दाङमा एउटा यात्रुबाहक जीप दुर्घटना हुँदा एक जनाको मृत्यु भएको छ। उक्त दुर्घटनामा ६ जना घाइते भएको प्रहरीले जनाएको छ। 

जिल्ला प्रहरी कार्यालय दाङका अनुसार दुर्घटनामा घोराही उपमहानगरपालिका–१२ का ४० वर्षीय शेरमान घर्तीको मृत्यु भएको हो। उपचारका लागि राप्ती स्वास्थ्य विज्ञान प्रतिष्ठानमा पुर्‍याएपछि उनलाई चिकित्सकले मृत घोषणा गरेका हुन्। 

घाइते भएका घोराही–१२ का १३ वर्षीय उमेश बुढा, ६ वर्षीय विकास बुढा, २८ वर्षीय धनबहादुर घर्ती, २५ वर्षीय मानबहादुर बुढा र तुलसीपुर उपमहानगरपालिका–१३ का ९ वर्षीय अनमोल पुनको प्रतिष्ठानमै उपचार भइरहेको छ।

गाडीधनी तथा चालक घोराही–१२ कै धमन घर्ती मगरलाई प्रहरीले नियन्त्रणमा राखेको छ। शुक्रबार राति घोराहीको साझखर्कबाट पश्चिमतिर जाँदै गरेको भे १ ज ६०४ नम्बरको जीप अनियन्त्रित भएर दुर्घटना भएको प्रहरीले जनाएको छ।