नेपालगन्ज: नेपालगन्जबाट रुकुमको राडीबजारतर्फ जाँदै गरेको बस भेरी नदीमा खसेको छ । बिहीबार साँझ करिब सात बजे जाजरकोटको भेरी नगरपालिका १ को खलंगा–रिम्ना सडक खण्डको पिपे गाउँभन्दा करिब दुई सय मिटर अगाडिबाट भे १ ख १३२९ नम्बरको बस भेरीमा खसेको हो । बसमा एक दर्जन यात्रु रहेको अनुमान गरिएको छ ।

प्राप्त जानकारी अनुसार जाजरकोटका प्रमुख जिल्ला अधिकारी ललितकुमार बस्नेतले बस दुर्घटनाको पुष्टि गर्दै उद्धारका लागि टोली परिचालन गरिएकोछ । ‘यात्रुवाहक बसको चलानीअनुसार आठ जना यात्रु रहेको देखिन्छ,’ प्रमुख जिल्ला अधिकारी ललितकुमार बस्नेतले भने । बस्नेतका अनुसार तीन जनाको शव नदीबाट निकालिएको छ भने पाँच जना घाइतेको उद्दार गरिएको छ । उनका अनुसार टिकट नलिएर कति जनाले गाडीमा यात्रा गरिरहेको भन्ने खुलेको छैन ।

समाचार तयार गर्दासम्म मृतक र घाइतेको सनाखत भएको छैन । उद्धारका लागि घटनास्थलमा प्रहरी परिचालन गरिएको छ । घटनास्थलमा रुकुम पश्चिमको चाइना बगरबाट प्रहरी उद्धारका लागि खटिएको प्रजिअ बस्नेतले जानकारी दिए । रुकुम प्रहरीका अनुसार चार जनाको शव निकालिसकेको छ । बस दुर्घटनाको बिस्तृत विवरण आउन बाँकी छ ।