नेपालगन्ज : बाँके प्रहरीले ठूलो मात्रामा ब्राउन सुगरसहित एकजनालाई नियन्त्रणमा लिएकोछ ।

जिल्ला प्रहरी कार्यालय बाँके र लागुऔषध नियन्त्रण ब्यूरो, नेपालगन्ज शाखाबाट खटेको प्रहरी टोलीले बाँकेको कोहलपुर नगरपालिका–११, एनटिभी रोडबाट ४४ ग्राम ५२० मिलिग्राम ब्राउनसुगर सहित एक जनालाई नियन्त्रणमा लिएको हो ।

यसरी प्रहरी नियन्त्रणमा पर्ने कोहलपुर नगरपालिका वडा नम्बर–१२ चप्पचरगौडी बस्ने ४५ वर्षका ईन्द्रमणी गौतम हुन् ।

प्रहरीका अनुसार गौतम यसअघि जाजरकोट जिल्लामा लागूऔषध चरेस मुद्दामा समेत पक्राउ परी १८ महिना कैद भुक्तान गरी छुटेको कुरा समेत खुल्न आएको छ ।

लागुऔषध ब्राउनसुगरको कारोबार भइरहेको भन्ने सूचना पाएको प्रहरीले शंकास्पद रुपमा रहेका गौतमलाई नियन्त्रणमा लिई तलासी लिदाँ गौतमले लगाएको पाईन्टको खल्तीबाट सेतो प्लाष्टिकको पुडिया बनाई राखेको ब्राउनसुगर धुलो १ पुडिया र तौल गर्ने डिजिटल मेसिन एक थान समेत फेला पारेको थियो ।

उक्त ब्राउनसुगर तौल गर्दा ४४ ग्राम ५२० मिलिग्राम रहेका प्रहरीले जनाएकोछ । बरामद ब्राउनसुगर, तौल गर्ने डिजिटल मेसिन सहित नियन्त्रणमा लिई अनुसन्धान भईरहेको बाँके प्रहरीले जनाएकोछ ।