नेपालगन्ज ११ असोज: आगामी दशैंको घटस्थापनादेखि नेपालगन्जको रामलीला मैदानमा रामलीला मञ्चन गरिदैँछ । 

पछिल्लो १५७ वर्षदेखी नेपालगन्जको रामलीला मैदानमा दशैँको बेला रामलीला मञ्चन हुँदै आएको छ । रामलीला मञ्चनका लागि भारतबाट कलाकार टोली बोलाउने गरिएको छ । तथापि कहिलेकाहीँ भारतबाट कलाकार ल्याउन असम्भव हुने गरेको छ ।

रामलीला सञ्चालक समितिका अध्यक्ष सन्तोषकुमार कनोडियाका अनुसार ऐतिहासिक संस्कृतिका रूपमा रहेको रामलीला मञ्चनका लागि वर्सेनी भारतबाट कलाकार टोली बोलाउँदा खर्च पनि बढी लाग्ने र कहिलेकाहीँ कलाकार नपाइने भएकाले नेपालगन्जमै कलाकार तयार पारिँदने गरिन्छ ।

रामलीला महोत्सवमा यसपटक पनि भारत वृन्दावनका कलाकार बोलाइएकोछ । उनीहरूबाटै स्थानीय कलाकारलाई रामलीलाका दृश्य, अभिनय सिकाइने छ ।

दशैँको पहिलो दिन घटस्थापनादेखि विजयादशमीको दिनसम्म स्थानीय रामलीला मैदानमा राति ८ः०० देखि १२ः०० बजेसम्म रामलीला मञ्चन गर्ने गरिन्छ । धनुष यज्ञ, रावणवध, भरतमिलाप र रामको शुभराज्याभिषेक भएर रामलीला महोत्सव समापन हुने गर्छ । 

यस क्षेत्रको परिचय बनेको रामलीला मञ्चनले नेपाल तथा भारतमा नेपालगन्जलाई चिनाएको स्थानीय अगुवाको भनाईछ ।