नेपालगन्ज १४ असोज : शहिद बैजनाथ थारुको सम्झनामा यहाँको स्थानीय सरकारले मुलगेट निर्माण गर्न लागेको छ । 

बैजनाथ गाउँपालिका कार्यालय, रामपुर बाँकेले चालु आर्थिक वर्ष २०८१÷०८२ को वार्षिक बजेटमार्फत उक्त शहिद गेट निर्माण गर्न लागेको हो । बैजनाथ गाउँपालिका कार्यालय रामपुर–५ जाने मुल सडक गडरहीस्थित एक नम्बर चोकमा मुलगेट निर्माण गरिनेछ । 

गाउँपालिका अध्यक्ष प्रकाशबहादुर शाहीले औपचारिक रुपमा उक्त गेटको शिलान्यास गरेका छन् । शिलान्यास भएसँगै निर्माण पक्षले काम अगाडी बढाएको छ ।

गाउँपालिकाले चालु आर्थिक वर्षका लागि उक्त शिर्षकमा १० लाख ७६ हजार रुपैयाँ बजेट विनियोजन गरेको छ । गाउँपालिका अध्यक्ष शाहीले स्वर्गीय शहिद बैजनाथको सम्झनामा उक्त गेट निर्माण गर्न लागिएको बताए । 

देशमा प्रजातन्त्र र लोकतन्त्र ल्याउनमा तत्कालिन निरंकुशता विरुद्ध लडेका शहिदको सम्मान गर्नु स्थानीय सरकारको दायित्व र कर्तब्य भएको उनले बताए ।

‘शहिद बैजनाथ थारुको सम्झनामा हामीले गाउँपालिकातिर जाने बाटोमा मुलगेट निर्माण गर्न लागेका हौं, यसको शिलान्यास कार्य सम्पन्न भइसकेको छ, अब निर्माणको काम पनि अगाडी बढ्नेछ,’ अध्यक्ष शाहीले भने ।