दाङ:दाङको तुलसीपुर उपमहानगरपालिका–१९ स्थित प्रादेशिक आयुर्वेद चिकित्सालयको पञ्चकर्मा कक्षमा आगलागी भएको छ ।

ग्यासमा पानी तताउने क्रममा आगलागी भएको अस्पतालका निमित्त निर्देशक डाक्टर रामकामेश्वर ठाकुरले जानकारी दिए ।

आगलागीबाट चिकित्सालयमा रहेका टेबुल, दराजलगायत सामग्री जलेर नष्ट भएको छ । ‘अस्पतालको सेवा केही दिन प्रभावित हुने अवस्था छ ।’, उनले भने,‘सेवा प्रदान गर्न वैकल्पिक उपाय अपनाइनेछ ।’

आगलागीबाट झण्डै एक लाख बराबरको क्षति भएको डाक्टर ठाकुरले बताए । नेपाल प्रहरी, सशस्त्र प्रहरी, चिकित्सालयका कर्मचारी र स्थानीयवासीले आगो निभाएका थिए । आगलागीबाट मानवीय क्षती भने हुन सकेन ।