नेपालगन्ज : बाँकेमा दुर्घटनाको रेसिओ बढेको छ । साउन यता मात्रै ३९ वटा सडक दुर्घटना भएका छन् ।

जसमा ५६ जना मानिस घाइते भएका छन् । १४ जनाको मृत्यु भएको छ । ट्राफिक प्रहरी बाँकेको तथ्याकंअनुसार मृत्यु हुने पुरूष आठ जना, महिला तीन जना, बालक दुई जना र बालिका एक जना छन् ।

बाँके ट्राफिक प्रहरीले साउन यता आईतबारसम्म पाँच हजार ६ सय ५० वटा सवारी साधनमाथि कारवाही गरेको ट्राफिक प्रहरी बाँकेका प्रहरी निरीक्षक पविन्द्र बम बताउँछन् ।

उनकाअनुसार यति सवारी साधन कारवाहीबाट तीन महिनामा बाँके ट्राफिकले ३० लाख ८४ हजार पाँच सय राजश्व संकलन समेत गरेको छ ।
उनकाअनुसार साउन यता ६८ जनालाई मापसे कारवाही रिएको छ । वडादशैको अवधीमा मात्रै १३ जना सवारी चालक मापसे कारवाहीमा परेका छन् ।

बडादशैको अवधीमा बाँकेमा ६ वटा सडक दुर्घटना भएका छन् । जसमा सात जना पुरूष र पाँच जना महिला घाइते भएका छन् । बडा दशैंको समयमा ट्राफिक नियमको उल्लंघन गर्ने ६ हजार ७ सय ६३ सवारी साधनलाई कारबाही गरिएको छ ।

असोज १२ देखि २४ गतेसम्मको अवधिमा प्रदेश पाँचका १२ जिल्लामा ट्राफिक नियम पालना नगर्ने सवारी साधनलाई कारबाही गरिएको प्रदेश ट्राफिक प्रहरी कार्यालय बुटवलले बताएको छ ।

बडा दशैंको अवधिमा ट्राफिक नियम पालना नगर्ने १२ जिल्लाका ६ हजार ७ सय ६३ सवारी साधनलाई कारबाही गरिएको प्रदेश ट्राफिक प्रहरी कार्यालयले जनाएको छ ।

सवारी साधनलाई गरिएको कारबाहीबाट दशैमा मात्रै ४० लाख ६० हजार ५ सय रुपैयाँ राजस्व संकलन भएको प्रदेश ट्राफिक कार्यालय बुटवलले जनाएकोछ ।

यो अवधिमा ट्राफिक नियम उल्लंघन गर्ने सवारी साधन मध्ये मोटरसाइकल अग्रप्रक्तिमा देखिएका छन् । प्रदेश प्रहरीका अनुसार प्रदेशका २ हजार ३ सय ३९ वटा मोटरसाइकल र स्कुटर कारबाहीमा परेका छन् ।

जसबाट १४ लाख ५३ हजार ५ सय रुपैयाँ राजस्व संकलन भएको छ ।

यस्तै, १ हजार ५२ वटा बस, १२ सय ७७ वटा जिप र कार, टेम्पो २ सय २३ वटा, ट्रक १४ सय ४९ वटा र ट्याक्टर ४ सय २३ वटा कारबाहीमा परेका थिए ।