नेपालगन्ज : कर्णाली प्रदेश प्रहरी प्रमुख डिआईजी पुर्णचन्द्र जोशीले नेपालगन्जमा रहेको कर्णाली प्रदेश प्रहरी तालिम केन्द्रमा भएको भनिएको घटनाको निष्पक्ष अनुसन्धान गर्न निर्देशन दिइसकेका छन् ।

डिआईजी जोशीले तालिम केन्द्रको कार्यक्षेत्र पर्ने बाँके प्रहरी कार्यालय र यसका प्रमुख एसपी वीरबहादुर ओलीलाई उक्त घटनाको सत्यतथ्य छानबीन र निष्पक्ष अनुसन्धान गर्न निर्देशन दिएका हुन् ।

उक्त तालिम केन्द्रमा तालिम गर्दै गरेकी एक महिला प्रशिक्षार्थीलाई बलात्कार गरेको आरोपमा प्रहरीकै एक प्रहरी नायब निरीक्षक (सई) पक्राउ परेका छन् ।

तालीम केन्द्रमा कार्यरत सई बमबहादुर रानाले गत आइतबार राती प्रहरी जवानको तालिम गर्दै गरेकी एक महिला प्रशिक्षार्थीलाई तालिमकेन्द्र भित्रको ब्यारेकमै बलात्कार गरेको उजुरी परेपछि उनलाई नियन्त्रणमा लिएको बाँके प्रहरीले बताएको छ ।

पक्राउ परेका सई रानालाई थप अनुसन्धानको लागि जबरजस्ती करणी मुद्दामा बाँके जिल्ला अदालतबाट मंगलबार सात दिनको म्याद थप गरिएको छ ।

यद्यपि कर्णाली प्रदेश प्रहरी तालिम केन्द्रका समादेशक मसाउद आलम खाँ लगायतका प्रहरी अधिकारीले ति महिला प्रशिक्षार्थीका आमाबुबालाई समेत बोलाएर मिलापत्र गर्न दवाब दिदै आएको खुलेको छ ।

तालिम केन्द्रभित्रको उक्त बलात्कार काण्ड गुपचुप राख्ने र मिलापत्र गराउने केही प्रहरी अधिकारीले चलखेल गरेपनि बुधबारसम्म उक्त घटना मिल्न सकेको छैन्। सई राना बुधबार पनि अनुसन्धानका लागि प्रहरी नियन्त्रणमै छन् ।