बर्दिया : भारतीय ओरियन्स कम्पनीको नेटवर्किङ व्यावसाय संचालन गरेको आरोपमा प्रहरीले ५ जनालाई पक्राउ गरेर अनुसन्धान थालेको छ । प्रहरी निरीक्षक लक्ष्मण वलीले पक्राउ परेकामध्ये ४ जना विरुद्ध जिल्ला र एक जना विरुद्ध इलाका प्रहरी कार्यालय बानियाभारले मुद्दा चलाएको जनाए ।

उक्त कम्पनीले पश्चिम तराइका बर्दिया, कैलाली, कञ्चनपुरका सर्वसाधरणलाई सदस्य बनाएको पाइएको छ । भारतको उत्तरप्रदेश राज्यस्थित लखिमपुरमा रहेको कम्पनीको सदस्य बन्न प्रति व्यक्ति ६० हजार भारतीय रुपैयाँ (भारु) शुल्क लाग्ने गरेको छ ।

एक जनाले थप दुई जनालाई सदस्य बनाउनु पर्ने नियम छ । उक्त कम्पनीबाट ठगिएको भन्दै २६ जनाले प्रहरी समक्ष उजुरी दिएका छन् । राजापुर–३ की सविता राजवंशीले सदस्यता बने वापत ६० हजार भारु बुझाएको बताइन । कैलालीको जोशीपुर–५ का अशोक दगौडा थारुले आफू ठगिएको भन्दै सदस्य बनाउने विरुद्ध उजुरी दिएका छन ।