नेपालगन्ज: यती एयरलाइन्सको विमान धावनमार्गमा चिप्लिएपछि अवरुद्ध भएको त्रिभुवन अन्तर्राष्ट्रिय विमानस्थलमा अझै उडान सुचारु हुन सकेको छैन ।

नेपालगन्जबाट यात्रु बोकेर काठमाडौं उडेको यती एयरलाइन्सको विमान अवतरणको क्रममा त्रिभुवन अन्तर्राष्ट्रिय विमानस्थलको धावनमार्गमा चिप्लिएको थियो ।

यति एयरको एटीआर–७२ को जहाज शुक्रबार बिहान धावनमार्गमा चिप्लिएको थियो। 

विमानस्थल कार्यालयले २ बजेसम्म विमान हटाइसक्ने भने पनि अहिलेसम्म काम सकिएको छैन । विमान सुचारु नहुदाँ नेपाल आउँदै गरेका अधिकांश विमान डाइभर्ट गरिएको छ ।

अहिले विमान हटाउने प्रयास भइरहेको छ । जहाजको एउटा पांग्रा हिलोमा गाडिएका कारण निकाल्न कठिन भएको विमानस्थल जनाएकोछ । हिलो र अधिक वर्षाका कारण काममा ढिलाइ भएको हो । चिप्लिएको यतीको विमानमा ३ जना विमानदल सहित ६६ जना यात्रु सवार थिए ।

त्रिभुवन अन्तराष्ट्रिय विमानस्थलका एसपी कृष्ण प्रसाद कोइरालाका अनुसार जहाजमा रहेका सबै यात्रुलाई सकुशल निकालिएको र २ जनालाई चाहिँ उपचारको लागि काठमाडौं मेडिकल कलेज पठाइएको छ । घाईते हुनेहरुमा को को थिए त्यो भने बताइएको छैन ।

धावन मार्गमै जहाज चिप्लिएपछि अहिले विमानको उडान–अवतरण दुवै अवरुद्ध बनेको छ । आन्तरिक तथा बाह्य उडानका कुनै पनि विमान उडेका छैनन् ।
वर्षा जारी रहेकाले अवरुद्ध विमानस्थल सञ्चालनमा आउन केही समय लाग्ने बताइएकोछ ।

ल्हासाबाट काठमाडौं आएको सिचुवान एयरलाइन्स, कोलकताबाट काठमाडौं आइरहेको बुद्ध एयर र दोहाबाट काठमाडौं आइरहेको कतार एयरलाइन्स आकाशमा होल्ड भएको छ ।