नेपालगन्ज : नेपालगन्ज उपमहानगरपालिकामा एक हजार १ सय ९७ लागुऔषध दुव्र्यसनी छन् । लागुऔषध दुव्र्यसनविरुद्ध क्रियाशील विभिन्न सात संस्थाले यसअघि गरेको प्रारम्भिक सर्वेक्षणअनुसार यति दुव्र्यसनी फेला परेको हुन् ।

उपमहानगरपालिकाभित्र लागुऔषध प्रयोगकर्ताको वर्तमान अवस्था यकिन गर्न नगरका २३ वटै वडाका जोखिमपूर्ण ४२ वटा स्थान छनोट गरी गरिएको प्रारम्भिक सर्वेक्षणमा नगर क्षेत्र लागुऔषधको उच्च जोखिममा रहेको र एक हजार १ सय ६३ पुरुष र ३४ महिला लागुऔषधको दुव्र्यसनीमा रहेको छ ।

तीमध्ये मुखबाट सेवन गर्ने एक हजार १२५, सुँघने ६३ र सुईंको माध्यमबाट लागुऔषध प्रयोग गर्ने नौ जना छन् । तथ्याङ्कअनुसार सबैभन्दा धेरै १६ देखि ४९ वर्ष उमेर समूहका एक हजार तीन, १२ वर्षमुनिका ६४ र ५० देखि ६१ वर्ष उमेर समूहका १३० छन् ।

लागुऔषध प्रयोगकर्तालाई यसको उपचार हुन्छ भन्ने जानकारी भए पनि हालसम्म २५० जनाले मात्र उपचार गर्दै आएको सर्वेक्षणमा जनाइएकोे छ । यो कूल संख्याको २० प्रतिशत मात्रै हो । सर्वेक्षणअनुसार नगर क्षेत्रमा लागुऔषध प्रयोगकर्ताको संख्या भयावह देखिएको साहारा हाउस नेपालगन्ज शाखाका सञ्चालक अभिराज क्षेत्रीले बताउँछन् ।

जिल्ला जनस्वास्थ्य कार्यालयका स्वास्थ्य अधिकृत रामबहादुर चन्दका अनुसार जिल्लामा पाँच हजारभन्दा बढी लागुऔषध सेवनकर्ता रहेको अनुमान छ । लागुऔषध प्रयोगकै कारण एचआइभीको जोखिम उच्च रहेको उनले बताए । यकिन तथ्याङ्क नहुँदा रणनीति तयार गर्न समस्या भइरहेको उनी बताउँछन् ।

प्रहरीको लागु औषध व्यूरोकै अनुसार एभिल, डाइजोपाम, लुबिक जेसिकजस्ता सामान्य मूल्यका कारोवबार घटेपनि ब्राउन सुगर, चरेश, अफिमलगायत महँगो मूल्यका लागुऔषध प्रयोगकर्ता बढेको छ ।

लागुऔषध कारोवारका लागि नेपालगन्ज ट्रान्जिट बन्ने खतरा पनि उत्तिकै बढेको छ । उक्त ब्यूरोकाअनुसार प्रतिमहीना औसत ३० जनाका दरले लागुऔषध ओसारपसार तथा दुव्र्यसनीमा संलग्न व्यक्तिलाई पक्राउ पर्ने गरेका छन् ।