नेपालगन्जःनेपालमा आत्महत्या गर्नेको संख्या दिनहुँ बढिरहेको छ । अघिल्लो वर्षको तुलनामा आत्महत्या गर्नेको दर ८ प्रतिशतले बढेको प्रहरी तथ्यांकले देखाउँछ । प्रहरी प्रधान कार्यालयको एक विवरणअनुसार दैनिक सरदर १६ जनाले अप्राकृतिक मृत्युको बाटो रोज्ने गरेका छन् । प्रहरीमा दर्ता मुद्दाको विवरण हेर्ने हो भने ज्यान मुद्दापछि सबैभन्दा बढी आत्महत्या भएको देखिन्छ ।

प्रहरी प्रधान कार्यालय अनुसार आर्थिक वर्ष ०७५/०७६ मा ५ हजार ७ सय ५४ जनाले आत्महत्या गरेका छन् । अघिल्लो आर्थिक वर्षमा यो संख्या कम थियो । गत आर्थिक वर्षमा ५ हजार ३ सय १७ जनाले आत्महत्या गरेका थिए ।
त्यस्तै, आर्थिक वर्ष ०७३/०७४ मा ५ हजार १ सय २४, ०७२/०७३ मा ४ हजार ६ सय ८० र ०७१/०७२ मा ४ हजार ३ सय ३२ जनाले आत्महत्या गरेको तथ्यांक छ ।

सबैभन्दा बढी झुण्डिएर आत्महत्या
प्रहरी प्रधान कार्यालयको अपराध अनुसन्धान विभागले गरेको अध्ययनमा सबैभन्दा बढी झुण्डिएर मानिसले आत्महत्या गरेको पाइएको छ । यसरी आत्महत्या गर्नेको संख्या आर्थिक वर्ष ०७५/०७६ मा ४ हजार ३ सय १२ थियो भने ०७४/०७५ मा ३ हजार ८ सय ६८ जनाले झुण्डिएर प्राण त्यागेका थिए ।

दोस्रोमा विष खाएर आत्महत्या गर्नेको संख्या उल्लेख्य देखिन्छ । आर्थिक वर्ष ०७५/०७६ मा १ हजार ३ सय २० जनाले विष खाएर आत्महत्या गरेका छन् । अघिल्लो आर्थिक वर्षमा १ हजार ३ सय ६३ जनाले विषय पिएका थिए ।

पानीमा हाम फालेर मृत्यु हुनेको संख्या ३० छ । आर्थिक वर्ष ०७४/०७५ मा चाहिँ ११ जनाले पानीमा हाम फालेर प्राण त्यागेका थिए । अग्लो स्थानबाट हाम फालेर आत्महत्या गर्नेको संख्या ४८ छ भने आर्थिक वर्ष ०७४/०७५ मा ५० थियो ।

आफैंलाई करेन्ट लगाएर आत्महत्या गर्नेको संख्या आर्थिक वर्ष ०७५/०७६ मा ४ छ भने अघिल्लो आर्थिक वर्षमा एक जनाले यसरी मृत्युवरण गरेका थिए ।

किन हुन्छ आत्महत्या ?
आत्महत्या बढ्नुको एउटा प्रमुख कारण मानिसको बदलिँदो जीवनशैलीलाई पनि मानिन्छ । एकातिर समाजको जीवनशैली खर्चिलो बनिरहेको छ भने अर्कोतिर बेरोजगारीको समस्या बढ्दै जानुले पनि दिनहुँ आत्महत्याले प्रसय पाइरहेकोछ ।

प्रविधिले ल्याएको सहजतासँगै यसले निम्त्याएको समस्या पनि बढ्दो छ । जसले गर्दा मानिसमा वितृष्णा पैदा हुनुका साथै सही समयमा सही निर्णय गर्ननसक्दा आत्महत्याको बाटो रोजिरहेको जानकार बताउँछन् ।

त्यसो त शिक्षा, स्वास्थ्यसँगै सन्तानको चिन्ताका कारण पनि आत्महत्या गर्नेको संख्या बढिरहेकोछ । मानिसमा सफलताको तीव्र आकांक्षा हुनु र असफलता प्राप्त हुँदा आफूलाई नियन्त्रण गर्न नसकि पनि मानिसले आत्महत्या गर्छन । तर, आत्महत्याको अधिकांश घटनामा भिन्दाभिन्दै समस्या र कारण भेटिन्छ ।

अभिभावकको माया नपाएर बच्चाले आत्महत्या गर्नु, युवा पुस्ताले प्रेम सम्बन्धमा दरार आउँदा अप्रिय निर्णय लिनु र प्रौढ उमेरकाले आर्थिक समस्या, प्रतिष्ठामा आएको आँच लगायतका कारण देह त्याग्ने गरेको विभिन्न अनुसन्धानबाट खुलेको छ ।

नेपालमा पछिल्ला दिनमा विवाहेत्तर सम्बन्धका कारण पनि आत्महत्या गर्नेको संख्या बढ्दो छ । श्रीमान विदेशमा भएको अवस्थामा हुने विवाहेत्तर सम्बन्धको पोल खुलेपछि आत्महत्या गरिएका पनि थुप्रै घटना नेपालमा छन् ।

सामाजिक सञ्जालले चरित्रमा ल्याएको विचलनले पनि आत्महत्यालाई प्रेरित गरिरहेको छ ।