नेपालगन्ज : एक बर्षको अवधीमा ट्राफिक प्रहरी बाँकेले ३१ हजार ६ सय ६७ सवारी साधनलाई कारवाही गरेको छ । बर्षमा ट्राफिक नियम उल्लघन गरेका सवारी साधन कारवाहीमा परेका हुन् ।

कारबाहीमा पर्ने सवारी साधनको संख्याले ट्राफिक प्रहरीको सक्रियता देखाएपनि सडक दुर्घटनामा भने कमी आएको छैन । बाँकेमा अघिल्ला बर्षमा भन्दा यसपाली दुर्घटना बढेका छन् ।

प्रहरीले भने राजस्व असुलीमा भन्दा दुर्घटनामा न्यूनिकरण र ट्राफिक नियमको पालनामा जोड दिएर कारबाही गरीएको दावी गरेको छ । प्रहरीको तथ्याकं अनुसार ट्राफिक नियम उल्लघन गर्नेमा एक नम्बरमा ट्रक र दोश्रो नम्बरमा मोटरसाइकल देखिएका छन ।

यसैबीच प्रदेशका १२ जिल्लामा करिब साढे दुइ लाख सवारी साधन कारबाहीमा परेका छन । प्रदेश ट्राफिक प्रहरी कार्यालय बुटवलले आर्थिक वर्ष २०७५०७६ मा ट्राफिक नियम उल्लङघन गर्ने २ लाख ४३ हजार ७५६ वटा सवारी साधनलाई कारवाही गरेको छ । ट्राफिक नियम विपरित संचालन गरिएका ती सवारी कारवाहीबाट १८ करोड ७७ लाख ८२ हजार रुपैयाँ राजस्व संकलन भएको छ ।

गत आर्थिक बर्षमा प्रदेशमा ९१ हजार ८४६ वटा ट्रक कारबाहीमा परेका छन । ट्राफिक नियम उल्लघन गर्ने ती ट्रकबाट जरीवाना बापत ५ करोड ४७ लाख ५० हजार राजश्व संकलन भएको छ ।

५५ हजार ८४ वटा मोटरसाइकल प्रहरी कारबाहीमा परेका छन । ती मोटरसाइकलको कारबाहीबाट ३ करोड ३७ लाख २८ हजार राजश्व संकलन भएको छ । कारबाहीमा परेका २३ हजार ८२९ वटा बसबाट १ करोड ४० लाख १५ हजार जरीवाना असुल भएको छ ।

३६ हजार ८४५ वटा जिपकार भ्यान कारबाहीमा परेका छन । जसबाट जरीवाना स्वरुप २ करोड ४७ लाख संकलन भएको छ । कारबाहीमा परेका २९ हजार ३३० वटा टेक्टरबाट १ करोड ६९ लाख ६५ हजार जरीवाना असुल गरीएको छ । कारबाहीमा परेका ६ हजार ८ सय २२ वटा टेम्पोबाट टेम्पोबाट जरीवानाको ४२ लाख ९३ हजार राजस्व संकलन भएको छ ।