दाङ: दाङको रिहारमा मोटरसाईकल दुर्घटना हुँदा दुईजनाको मृत्यु भएकोछ ।

पूर्वपश्चिम राजमार्ग अन्तर्गत दाङको लमही नगरपालिका–९ रिहारमा शनिबार दिउँसो मोटरसाइकल दुर्घटना हुँदा दुई जनाको मृत्यु भएको हो ।

मोटरसाईकल दुर्घटनामा परि नेपालगन्ज उपमहानगरपालिका वडा नम्बर ४ का रमेश बस्नेत र दाङ घोराही–५ धर्नाका बिनोद बस्नेतको मृत्यु भएको प्रहरीले जनाएकोछ ।

शनिबार दिउँसो मृतकद्वय सवार रा ३ प ११३१ नम्बरको मोटरसाइकल दुर्घटना हुँदा गम्भीर घाईते भएका उनीहरुको उपचारका क्रममा ज्यान गएको हो ।

दुर्घटनामा गम्भीर घाईते भएका रमेशको लमही अस्पतालमा र बिनोदको राप्ती स्वास्थ्य विज्ञान प्रतिष्ठान घोराहीमा उपचारको क्रममा मृत्यु भएको वडा प्रहरी कार्यालय लमहीका प्रहरी निरीक्षक प्रज्जवल थपलियाले जनाएकाछन् ।

उनीहरू चढेको मोटरसाइकललाई गाडीले ठक्कर दिएर भागेको प्रत्यक्षदर्शीले बताएका छन् । तर, गाडीको पहिचान भएको छैन । घटना लगत्तै प्रहरीले ठक्कर दिने गाडीको पहिचान र खोजी कार्यलाई अगाडी बढाएकोछ ।