चितवन:दिनहुँ प्रर्दशन र नारावाजी हुन थालेपछि जिल्ला प्रशासन कार्यालय चितवनले निषेधित क्षेत्र घोषणा गरेको छ । भरतपुरको चौबीसकोठीदेखि मालपोतचोकसम्म जिल्ला प्रशासन कार्यालय, चितवनले निषेधित क्षेत्र घोषणा गरेको हो ।

निषेधित क्षेत्रमा अस्पताल, सरकारी कार्यालय, अदालतजस्ता सम्वेदनशील निकायहरू छन् ।

पत्रकार शालिकराम पुडासैनी मृत्यु प्रकरणबारे अनुसन्धान गर्न रवि लामिछानेलगायतका सञ्चारकर्मीलाई प्रहरीले नियन्त्रणमा लिएपछि उनको पक्ष र विपक्षमा केही दिनदेखि सो क्षेत्रमा प्रदर्शन हुन थालेपछि जिल्ला प्रशासन कार्यालय चितवनले उक्त क्षेत्र निषेधित क्षेत्र घोषणा गरेको हो ।

चितवनका प्रहरी प्रमुख (एसपी) दानबहादुर मल्लले आजदेखि जिल्लाको सुरक्षा व्यवस्था थप कडा बनाइएको बताए ।

यस्तै, जिल्ला प्रहरी कार्यालय, चितवनका डीएसपी दीपेन्द्र शाहले प्रर्दशन र नारावाजीले कामकाजमा बाधा परेकाले भरतपुरको चौबीसकोठीदेखि मालपोतचोकसम्मका क्षेत्रमा प्रर्दशनमा रोक लगाइएको बताए ।

यसैबीच, चितवनका राजनीतिक दलहरूले पत्रकार शालिकराम पुडासैनी हत्या प्रकरणबारे निष्पक्ष छानबिन गर्न प्रशासनलाई सहयोग गर्ने सहमति जनाएकाछन् ।
रवि लामिछानेलगायतका सञ्चारकर्मी पक्राउको विषयलाई लिएर पक्ष र विपक्षमा नाराबाजी हुन थालेपछि सो क्षेत्रमा क्रियाशील राजनीतिक दलहरूले हिजो आईतबार यस्तो सहमति गरेका हुन् ।

उनीहरुले घटनाबारे निष्पक्ष छानविनका लागि सहयोग गर्न र शान्तिपूर्ण प्रर्दशन गर्न सवैलाई आग्रह गरेका छन् । 

पत्रकार पुडासैनी साउन २० गते चितवनको नारायणगढ, बसपार्क स्थित कंगारु होटलमा झुण्डिएको अवस्थामा भेटिएका थिए । उनको मृत्यु रहस्मय भएकाले सोबारे निष्पक्ष छानबिन हुनुपर्ने माग उठ्दै आएको थियो ।

पत्रकार पुडासैनीको मृत्युको घटना र पत्रकाउ परेका सञ्चारकर्मी लगायतका ब्यक्तिका पक्ष तथा विपक्षमा विरोध हुन थालेपछि पछिल्लो समय जिल्ला प्रहरी कार्यालय, चितवनसँगै केन्द्रीय अनुसन्धान ब्यूरो (सीआईवी)ले अनुसन्धान गरिरहेको छ ।

पत्रकार लामिछानेसहितका तीनमाथि जिल्ला प्रहरी कार्यालय, चितवनले साउन ३१ गते जिल्ला अदालतबाट ५ दिनको म्याद लिएर अनुसन्धान गरिरहेको हो । स्रोतका अनुसार, अनुसन्धान नसकिएकाले प्रहरीले भोलि पुनः म्याद थपका लागि लामिछानेसहितका तीनै जनालाई अदालतमा उपस्थिति गराउने तयारी गरिरहेको छ ।