नेपालगन्जः दाङबाट नेपालगन्ज आउँदै गरेको बा २ ख १८९७ नम्बरको हायस दुर्घटना भएको छ । नेपालगन्ज–कोहलपुर सडकखण्डको कारकाँदो स्थित सडक विभाग नजिक दाङबाट नेपालगन्ज आउदै गरेको सो हायस शुक्रबार राती साढे ९ बजे दुर्घटना भएको हो ।

तिव्र गतिमा नेपालगन्ज आइरहेको हायस अनियन्त्रित भई सडक विचमा रहेको डिभाइडरमा ठोक्किर उछिट्टिएको हायस ग्रिनबेल्टको सोलार बत्तिको पोलमा ठोक्किदाँ चार जना घाइते भएका छन् ।

घाईतेहरुको नेपालगन्ज मेडिकल कलेजमा उपचार भइरहेकोछ । हायस दुर्घटनामा परि चक्रबहादुर रावत, टिका देवकोटा, वारिस वेहना र मेराज साई गम्भीर घाइते भएको मेडिकल कलेज सुरक्षार्थ खटिएका प्रहरी हवल्दार टंक सोनीले जानकारी दिए । घाईते चक्रबहादुर रावत हायस चालक भएको प्रहरी हवल्दार सोनीले बताए ।

हायस गाडी चालक ३८ वर्षिय चक्रबहादुर रावत, हायसमा सवार ४२ वर्षिय टिका देवकोटाको टाउकोमा गम्भीर चोट लागेका कारण अवस्था गम्भीर रहेको छ भने १८ वर्षिय वारिस बेहेना र १४ वर्षिय मेराज साईको अवस्था सामान्य रहेको उनले बताए ।

दुर्घटनाग्रस्त हायसमा चालक चक्रबहादुर रावत र टिका देवकोटामात्र सवार थिए भने घाईते वारिस र मेराज पैदल यात्रु भएको उनले बताए ।
सोलार विजुलीको पोलमा ठोकिएको हायसको अगाडीको भाग पुरै क्षती भएकोछ ।