नेपालगन्ज १४ भदौ : अमेरिकाको टेक्सासस्थित ह्युस्टनमा नेपाली छात्रा मुना पाण्डेको हत्या अभियोगमा पक्राउ परेका ५१ वर्षीय बबिसिंह साहविरूद्ध दुईवटा मुद्दा दर्ता भएको छ । 

बिहीबार ह्यारिस काउन्टीको सरकारी वकिल कार्यालयले बबिविरूद्ध हत्या (क्यापिटल मर्डर) र गैरकानूनी हातहतियार विरूद्धको मुद्दा दर्ता गरेको स्थानीय सञ्चारमाध्यमहरूले उल्लेख गरेका छन् । 

यो पनि पढ्नुहोस् अमेरिकामा नेपाली छात्रा मुनालाई गोली हान्ने सन्दीग्ध व्यक्ति पक्राउ

बबि बुधबार स्थानीय समयअनुसार राति ९ बजे पक्राउ परेका थिए । त्यसअघि प्रहरीले सिसीटिभी फुटेजबाट प्राप्त भएको अभियुक्तको तस्बिर सार्वजनिक गरेको थियो । लगत्तै बबी बन्दुकसहित पक्राउ परेका थिए । 

उनलाई हत्या मुद्दामा ३ अक्टोबर र गैरकानूनी रूपमा हतियार बोकेर हिँडेको मुद्दामा अक्टोबर ५ मा अदालतमा उपस्थित गराइने बताइएको छ । सरकारी वकिल कार्यालयको स्टेटमेन्टमा  डकैती गर्ने क्रममा अभियुक्तले मुना पाण्डेमाथि गोली चलाएको भनिएको छ ।

ह्युस्टनका विभिन्न स्थानीय सञ्चारमाध्यमहरूले पनि प्रहरीलाई उद्धृत गर्दै बबिसिंह डकैती गर्न मुनाको अपार्टमेन्टमा पुगेको लेखेका छन् । अभियुक्त शनिबार राति ८ः४० बजे मुना बस्ने अपार्टमेन्टमा पुगेका थिए ।

पेस्तोलसहित पुगेका उनले केहीबेर ढोका ढक्ढकाए । ढोका खोलेर बाहिर निस्केकी मुनाले सोधखोज गर्न नपाउँदै ती अभियुक्तले कोठा भित्रतर्फ धकेलेको र आफूपनि प्रवेश गरी भित्रबाटै चुकुल लगाएको प्रहरीलाई उद्धृत गर्दै क्लिकटुह्युस्टनले उल्लेख गरेको छ ।

यो पनि पढ्नुहोस् अमेरिकामा रहेकी मुनालाई उनकै अपार्टमेन्टभित्रै पसेर गोली हानिएको थियो

सिसीटिभी फुटेजअनुसार त्यतिबेला मुनाको हातमा सपिङ ब्याग, पर्स लगायत केही सामग्रीहरू देखिएको थियो । त्यसको एक घण्टापछि अभियुक्त घरबाहिर निस्किएका थिए । त्यही रात छिमेकीहरूले केही पड्केको असामान्य आवाज सुनेको पनि प्रहरीलाई बताएका छन् ।

मुना सोमबार साँझ पौने ६ बजे मृत भेटिएकी थिइन् । उनको शरीरका विभिन्न भागमा गोली प्रहार भएको अवस्थामा मृत भेटिएकी थिइन् । प्रहरीका अनुसार मुनाको टाउको पछाडिको भागमा पनि एउटा गोली प्रहार भएको छ । 

पक्राउ परेका बबिलाई बिहीबार प्रहरीले अदालतमा उपस्थित गराएको थियो । अदालतले उनलाई जमानतमा छाड्न अस्वीकार गरिसकेको छ । 

नियतवश घातक हतियाले प्रहार गरिएको अदालती कागजातबाट खुलेको छ । पक्राउ परेका आरोपी बबीसिंहको बयानको आधारमा यस्तो खुलासा भएको नेपयोर्कले उल्लेख गरेको छ ।

२६२ औं राज्य जिल्ला अदालतमा सिन्हलाई हत्याको मुद्दा परेको छ । उनी पटके अपराधी भएको र पटक पटक जेल परेको खुलेको छ । अदालतको अर्को सुनुवाइ अगाडि सेप्टेम्बर ५ अर्थात् भदौ २० मा हुने भएको छ ।

उनीविरूद्ध दर्ता भएको अभियोगमा आजीवन कारावासदेखि मृत्युदण्डसम्मको सजाय हुने व्यवस्था छ ।  २१ वर्षीया मुना ह्युस्टन कम्युनिटी कलेजमा नर्सिङ पढ्दै थिइन् । उनी सन् २०२१ मा अध्ययनका लागि अमेरिका गएकी थिइन् ।