नेपालगन्ज : प्रहरीले बाँकेमा गोली हानेर एक जनालाई पक्राउ गरेको छ । डाँका चोरी मुद्दाका फरार प्रतिवादी नरेन्द्र न्यौपानेलाई प्रहरीले नेपालगन्ज उपमहानगरपालिकाको राँझाचोक नजिकै गोली प्रहार गरेर पक्राउ गरेको हो ।

भारतबाट नेपाल आइरहेको सूचनाको आधारमा जमुनाहा नाका पुगेको ईलाका प्रहरी कार्यालय कोहलपुरको टोलीले उनलाई पक्राउ गरी ल्याउँदै थियो । राँझाचोक नजिक आइपुगेपछि न्यौपाने प्रहरीले चलाएको मोटरसाइकलबाट हाम फालेर भागेपछि गोली चलाएको जिल्ला प्रहरी कार्यालय बाँकेका एसपी वीरबहादुर वलीले बताए ।

बाँकेको बैजनाथ गाउँपालिका ४ बानियाँभार घर भएका न्यौपानेको बाँया खुट्टामा गोली लागेको छ । उनको नेपालगन्ज मेडिकल कलेजमा उपचार भएको छ ।

२०६८ सालमा बर्दियाकोो बाँसगढीमा संयुक्त राष्टू संघको गाडीमा हतियार देखाएर लुटपाट गरेको अभियोगमा न्यौपानेसहितका व्यक्तिलाई जिल्ला अदालत बर्दियाले ६ वर्ष कैद र २७ हजार ९ सय रुपैयाँ जरिवानाको फैसला सुनाएको थियो । तर, उनीहरु फरार थिए ।

सजाय भए लगत्तै फरार भएका बाँके बैजनाथ गाँउपालिका वडा नम्बर ४ का न्यौपानेलाई बैदेशिक रोजगारीबाट फर्केका थिए ।

यूएनको गाडी चोरी तथा डकैती गरेको आरोपमा न्यौपाने सहित अरु दुई जना अझै फरार रहेको ईलाका प्रहरी कार्यालय कोहलपुरका डिएसपी हेमबहादुर शाही बताउँछन् ।