नेपालगन्ज: सीता एयरको जहाज दुर्घटना हुनबाट बचेकोछ ।

लुक्लाबाट काठमाडौंका लागि उडेको सीता एयरको जहाज दुर्घटनाबाट बचेको हो ।

सीता एयरको एउटा ईन्जिन आकाशमै फेल भएपछि चालकले सुरक्षित अवतरण गराउन सफल भएकाछन् ।

बुधबार बिहान लुक्लाबाट उडेको ९ एन–एजेएच जहाजलाई चालकले त्रिभुवन अन्तराष्ट्रिय विमानस्थलमा सुरक्षित अवतरण गराउन सफल भएको कम्पनीले जनाएको छ ।

आकाशमै ईन्जिन फेल भएपछि चालकले बुधबार बिहान करीब पौने ९ बजे जहाजलाई त्रिभुवन अन्तराष्ट्रिय विमानस्थलमा आकस्मिक अवतरण गरेका थिए ।

कम्पनीकाअनुसार जहाजमा यात्रु भने थिएनन् । सीता एयरका वरिष्ठ महाप्रबन्धक घनश्याम आचार्यले चालक दलका सदस्य र जहाज सुरक्षित रहेको आफ्नो ट्विटमार्फत जानकारी गराएका छन् ।

नेपाल नागरिक उड्डयन प्राधिकरणसँगको समन्वयमा सबै जहाजको इन्जिन परीक्षण हुने र त्यसपछि आगामी उडान निश्चित गरिने उनले जानकारी दिएका छन् ।

सीता एयरले पहाडी र हिमाली भेगका विमानस्थलमा उडान भर्दै आएकोछ । त्यसमध्ये लुक्ला मूख्य विमानस्थल हो ।

लुक्ला विमानस्थल जोखिमपूर्ण विमानस्थल मानिन्छ ।