नेपालगन्ज २५ कार्तिक : कार्तिक शुक्ल नवमी, सनातन धर्मावलम्बीले आज कुष्माण्ड नवमी मनाउँदैछन् । आजको यो दिन कुष्माण्ड नवमीलाई अक्षय नवमी, अमला नवमी र धात्री नवमीको नामले चिनिन्छ । 

आजको दिन अमलाको वृक्षको पूजा गर्ने गरिन्छ । भगवान विष्णु कार्तिक शुक्ल नवमीबाट कार्तिक पूर्णिमा तिथिसम्म अमलाको रुखमा निवास गर्नुहुने धार्मिक मान्यता रहेको छ । 

आजको दिन अमलाको अतिरिक्त भगवान् विष्णुजीको पनि विधि विधानले पूजा अर्चना गर्ने गरिन्छ । कुष्माण्ड नवमीको दिन स्नान, पूजा, तर्पण तथा अन्न आदिको दान गर्नाले अक्षय फल मिल्ने शास्त्रमा उल्लेख छ।
यो दिन भगवान् विष्णुले कुष्माण्डक नाम गरेको दैत्यलाई मारेको विश्वास गरिन्छ । आज कुभिण्डो दान गर्दा ठूलो पुण्यलाभ हुने धार्मिक विश्वास छ । 

नवमीदेखि तीनदिनसम्म वैवाहिक उत्सव गरी पीपलका साथमा अमलाको विवाह गराउँदा पुण्यलाभ हुने मान्यता छ । आजका दिन अमलाका रुखमुनि ब्राह्मणभोजन गराउने वा वनभोज खाने चलन पनि छ ।