नेपालगन्ज : चाडबाड नजिकिएसगैं अबैध धन्दा मौलाएकोछ । प्रहरी तथा प्रशासनको आँखा छलेर अबैध धन्दा गर्ने समुह सक्रिय भएका हुन् ।
जिल्लाका विभिन्न नाकाबाट अबैध कार्य मौलाएपछि बाँके प्रहरीले समेत तदारुक्ता देखाएकोछ ।

ईलाका प्रहरी कार्यालय कोहलपुरले शुक्रबार राती साढे १२ बजे अवैधरुपमा नेपाल भित्र्र्याइएका ठूला मात्रामा खसी नियन्त्रणमा लिएकोछ ।
कोहलपुरबाट पूर्वतर्फ जाँदै गरेको ना ७ ख ८९९८ नम्बरको ट्रकमा लोड गरि ६४ ओटा खसी बाँकेको कोहलपुर नगरपालिका वडा नम्बर १२ चप्परगौडीबाट प्रहरीले बरामद गरेको हो ।

नियमित चेकजाँचका क्रममा ६४ खसी फेला परेका ईलाका प्रहरी कार्यालयका प्रहरी नायब उपरीक्षक हेमबहादुर शाहीले बताए । उनले नियन्त्रणमा लिइएका खसिको मूल्य पाँच लाख बराबरको रहेको बताए ।

प्रहरीद्वारा नियन्त्रणमा लिइएको खसि तथा ट्रक चालक कृष्णप्रसाद पराजुलीलाई आवश्यक कारबाहीका लागि भन्सार कार्यालय नेपालगन्जमा बुझाइएको जानकारी दिए ।

नेपालगन्ज नाकाबाट भारतीय खसीबोकाको आयातमा रोक लगाएसँगै ग्रामीण क्षेत्रका नाकाबाट तस्करी बढेको छ । सरकारले भारतबाट स्वास्थ्य प्रमाणपत्र नलिई ल्याइएका पशुपक्षी, पशु उत्पादन सामग्री तथा पशुजन्य पदार्थको क्वारेन्टाइन नगर्ने नीति कार्यान्वयन गरेपछि खसीबोका ग्रामीण नाकाबाट तस्करी हुन थालेको हो ।

नेपालगन्जस्थित पशु क्वारेन्टाइन चेकपोष्टले ‘क्वारेन्टाइन नगर्ने’ भएपछि व्यापारीले छोटी नाकाबाट खसीबोका तस्करी गरेर नेपालगन्ज ल्याउने गरेको पाइएको छ ।

अवैधरुपमा नेपाल ल्याइएको खसीबोका प्रहरीले दैनिकजसो नियन्त्रणमा लिने गरेकोछ । दुई हप्ताअघि पनि भारतबाट तस्करी गरेर ल्याउँदै गरेका तीन लाख २० हजार मूल्यका ३९ खसीबोका प्रहरीले राप्तीसोनारी गाउँपालिका वडा नम्बर ४ बैजापुरबाट नियन्त्रणमा लिएको थियो ।