नेपालगन्ज:प्रहरीको तथ्याकं अनुसार एक वर्षको अवधीमा बाँकेमा ५५ जनाले आत्महत्या गरेका छन् । रेकर्डअनुसार आर्थिक वर्ष ०७४/७५ मा बाँकेमा मात्रै ५५ जनाले यो वा त्यो वहानामा आत्महत्या गरेका छन् ।

मानिसमा छिटो प्रगति गर्ने चाहना, आकांक्षा र कुण्ठाले डिप्रेसन हुने र सोही डिप्रेसनमा परेकाले आत्महत्याको निर्णय गर्ने मनोचिकित्सक डाक्टर विक्रम काफ्ले बताउँछन् ।

कतिपयले भोलि केही गर्न सकिएला भनेर नसोची गलत निर्णय लिंदा मृत्युवरण गर्ने गरेका छन । उनले भने, ‘पछिल्लो समय यो अवस्था जटिल बन्दै छ ।’ आत्महत्या गर्नेमध्ये झुण्डिएर मर्नेको संख्या बढी छ ।

प्रहरीले सार्वजनिक गरेको तथ्यांकअनुसार प्रदेश पाँचमा एक वर्षमा एक हजार एक सय १८ जनाले आत्महत्या गरेका छन् । प्रदेशमा औसतमा दैनिक चार जनाले आत्महत्या गर्ने गरेको देखिएको छ ।

गत वर्ष ७ सय ५६ ले झुण्डिएर आत्महत्या गरेका थिए । २ सय ९८ ले विष सेवन गरी आत्महत्या गरेका थिए । आफैं गोली हानेर दुई र आगो लगाएर पाँच जनाले आत्महत्या गरेको प्रहरी तथ्यांक छ । यसअघि एक हजार ९४ जनाले आत्महत्या गरेका थिए ।

प्रदेश प्रहरीको रेकर्डअनुसार रूपन्देहीमा २ सय २७, पाल्पामा ९०, दाङमा २ सय १२, कपिलवस्तुमा १ सय ३०, नवलपरासीमा ८६, बर्दियामा ८३, प्यूठानमा ६८, रोल्पामा ५७ जनाले आत्महत्या गरेका छन् ।

यसैगरी, गुल्मीमा ५५, अर्घाखाँचीमा ४५, बाँकेमा ५५ र पूर्वी रुकुममा १० जनाले आत्महत्या गरेका छन् ।

बढ्दो महत्वकांक्षा र बदलिंदो जीवनशैलीले पनि आत्महत्या बढ्दै गएको बाँकेका प्रहरी प्रमुख एसपी वीरबहादुर ओली बताउँछन् ।