नेपालगन्ज: सडक दुर्घटनामा मृत्यु भएकी सिता चौधरीको आफन्तले चक्का जाम गरेकाछन् । दोषीलाई पत्ता गरि कारबाही गरिनुपर्ने माग राख्दै पीडित पक्षले शनिबार बेलुका घटनास्थलमा चक्का जाम गरेका हुन् ।

नेपालगन्ज उपमहागनरपालिका वडा नम्बर १२, स्थित नर्सिङ्ग होम अगाडी सुर्खेतरोडमा आज शनिबार विहान मोटरसाईकलले ठक्कर दिदाँ सिताको मृत्यु भएको हो ।

सडक पार गर्ने क्रममा तिव्रगतिमा आएको मोटरसाईकलले ठक्कर दिएपछि उछिट्टिएर सडकमा लडेकी सिताको नर्सिङहोममा उपचारका क्रममा मृत्यु भएको वडा प्रहरी कार्यालय नेपालगन्जका ईन्चार्ज प्रहरी निरीक्षक हरिबहादुर बस्नेतले जानकारी दिए ।

प्रहरी निरीक्षक वस्नेतका अनुसार नर्सिङ होम अगाडी मोटरसाईकलले मृतक सितालाई ठक्कर दिएको हो । बिहान साढे १० बजे नम्बर नखुलेको स्पेलेण्डर मोटरसाइकलले ठक्कर दिदा गम्भीर घाइते भएकी सिताको उपचारका क्रममा मृत्यु भएको थियो ।’

उनले भने सितालाई ठक्कर दिने मोटरसाईकल र चालक पहिचान हुन सकेको छैन । आफ्नो माताहतका सवै विटहरुमा खबर गरि मोटरसाईकल र चालकको खोजी गरिरहेकाछौं ।

दाङ्ग गडवा ७ स्थायी ठेगाना भएकी २२ वर्षिय सिता नेपालगन्ज स्थित एक फार्मेसीमा जागिरे रहेको बुझिएको प्रहरीले जनाएकोछ । उनको शव पोष्टमार्टमका लागि भेरी अस्पताल नेपालगन्जमा राखिएकोछ ।

पछिल्ला दिन सडक दुर्घटनाको दर दिनानुदिन बढिरहेकोछ । सडकमा सवारी चाप बढ्नु, अव्यवस्थित पार्किङ्ग, मनपरि सडक पार गर्नु, चालक र पैदल यात्रुको लापरबाही एवंम तिव्र गतिका कारण दुर्घटना बढेको हो ।

चाडबाड नजिकिएसंगै सडक दुर्घटनाका दर बढ्ने गरेको यसअघि ट्राफिक प्रहरीले जारी गरेको तथ्यांकले समेत देखाएकोछ ।