नेपालगन्ज : बाँकेको नेपालगन्जस्थित जमुनाह नाका असुरक्षित बन्दै गएको छ । बाँके प्रहरीले सीमामा कडा सुरक्षाको व्यवस्था गरेको भन्दै जति गर्जन छोडेपनि पछिल्लो समय उक्त नाका महिलाका लागि एकदमै असुरक्षित भइरहेको छ ।

जोखिमपूर्ण यात्रामा वैदेशिक रोजगारीमा जान निस्केका महिलाको तथ्याकलाई निहाल्दा उक्त नाका असुरक्षित बन्दै गएको प्रष्ट देखिएको छ ।
मानव दलालले महिलालाई भारत तथा खाडी मुलुकमा पु¥याउन उक्त नाकाको चरम प्रयोग गर्दैआएका छन् । तर, सीमा सुरक्षाका लागि खटिएको जनपथ, सशस्त्र लगायतको सुरक्षा निकाय टुलुटुलु हेरेर बस्ने गरेको छ ।

अधिकांश महिला तरकारी किन्न रुपैडिहा जान लागेको बहानाबाजीमै दालको फन्दामा पर्ने गरेका छन् । भारतका कोठी तथा खाडी मुलुकबाट उद्धार गरिएका अधिकाँश महिलाले नेपालगन्ज नाका हुँदै गएको बयान दिदै आएका छन् ।

यसबाट पनि प्रमाणित हुन्छ कि उक्त नाका कति असुरक्षित बनिरहेको रहिछ । बेचिएका र जोखिममा परेका चेली फर्काउन नेपाल र भारतबीच सन्धि सम्झौता नभएको  जानकारहरु बताउँछन् ।

आर्थिक वर्ष २०७५/७६ मा ५७ चेलीको विदेशी भूमिबाट उद्धार गरिएको छ । माइती नेपालका क्षेत्रीय संयोजक केशव कोइरालाका अनुसार आव २०७४/७५ मा ५२ जना, २०७३/७४ मा ५१ जना, २०७२/७३ मा २६ जना, २०७१/७२ मा १९ जना, २०७०/७१ मा ३१ जना, २०६९/७० मा १४ जना र २०६८/६९ मा चार जनाको उद्धार गरेको छ ।

आव २०७५/७६ मा ९०२ जनालाई माइती नेपालले सीमाबाट उद्धार गरी आवधिक गृहमा पठाएको थियो । आव २०७४/७५ मा ९ सय ३० जना, २०७३/७४ मा १ हजार १ सय २७ जना, २०७२/७३ मा ८ सय ५० जना, २०७०/७१ मा ४ सय ४ जनालाई उद्धार गरी आवधिक गृहमा राखेको थियो ।

माइती नेपालले आव २०७५/७६ मा ३ सय ५१ जनालाई नेपाल–भारत सीमाबाटै परामर्श दिई घर फर्काएको तथ्यांकमा उल्लेख गरेको छ । यसले पनि उक्त सीमानाका अति असुरक्षितको सूचीमा परेको छ ।