नेपालगन्ज : ग्यारेजमा राखिएको गाडी मर्मत गर्ने क्रममा करेन्ट लागेर नेपालगन्जमा एक जनाको मृत्यु भएको छ ।

करेन्ट लागेर कोहलपुर–१२ का ३५ वर्षीय ललित श्रेष्ठको मृत्यु भएको हो ।

ना ६ ख ५३६४ नम्बरको गाडीको चक्का निकालेर मर्मत गर्ने क्रममा नजिकै रहेको विजुलीको नाङ्गो तारमा छोइँदा श्रेष्ठलाई
करेन्ट लागेको प्रहरीले बताएको छ ।

नेपालगन्ज उपमहानगरपालिका–४ बसपार्कमा रहेको राजु ग्यारेजमा बसमा वेल्डिङ्ग गर्ने क्रममा करेन्ट लागेर उनको मृत्यु भएको जिल्ला प्रहरी कार्यालय बाँकेका प्रहरी नायव उपरीक्षक शिवबहादुर सिंहले बताए ।

उनका अनुसार राजु सुनार पट्टावालाले सञ्चालन गरेको सो ग्यारेजमा वेल्डिङ्ग गर्दै गर्दा सोही बसका सहचलक श्रेष्ठको बिहीबार विहान साढे ११ बजे गम्भीर घाईते भएका थिए ।

उपचारका लागि नेपालगन्ज मेडिकल कलेज शिक्षण अस्पताल नेपालगन्जमा पुराए लगत्तै उनको मृत्यु भएको प्रहरीले जनाएको छ । स्याङ्गजा घर भई हाल कोहलपुर –१२ चपरगौढी श्रेष्ठ बस्दै आएका थिए । प्रहरीले अनुसंघानको लागि एक व्यक्तिलाई नियन्त्रणमा लिएको छ ।