नेपालगन्ज: नेपालगन्ज उपमहानगरपालिका विपी चोक नजिक एक युवामाथि सांघातिक आक्रमण भएकोछ ।

विपी चोक स्थित प्रहरी विट छेउमा खुलेको रेष्टूरेन्टमा अज्ञात समूहले आक्रमण गर्दा एकजना घाइते भएकाछन् ।

इमरान इराकीले खोलेको पसलमा भएको आक्रमणबाट नेपालगन्ज निवासी २१ वर्षिय यासिर फिरोज जरगढ घाईते भएको जिल्ला प्रहरी कार्यालय बाँकेका प्रहरी उपरीक्षक वीरबहादुर ओलीले जानकारी दिए ।

प्रहरी उपरीक्षक ओलीका अनुसार घाईतेको अवस्था सामान्य रहेको र नेपालगन्ज मेडिकल कलेज नेपालगन्जमा उपचार भइरहेको छ । घटना घटे लगत्तै प्रहरीले शंका लागेका दुईजना युवालाई नियन्त्रणमा लिएकोछ । भने रेष्टूँरेण्ट सञ्चालक इमरान इराकीलाई समेत नियन्त्रणमा लिइ घटनाका बारेमा अनुसन्धान भइरहेको बताए ।

सेतोखरीसंग कुरा गर्दै बाँके प्रहरी प्रमुख ओलीले भने कसले किन कति कारणले आक्रमण गरेको हो ? कोको थिए ? तरबार वा खुकुरी कुन हतियारले प्रहार भएको हो वा होइन अझै पत्ता नलागेकोले सवै अनुसन्धानबाट खुल्छ ।

उनले भने –‘घटना स्थलमा प्रहरी परिचालन गरेकाछौं । दोषीको पहिचान गरि खोजी कार्य जारी राखेकाछौं । चाडबाडका बेला गुण्डागर्दी गरि जिल्लाको शान्ति सुरक्षा विथोल्ने जो सुकैलाई कडा कारबाही हुन्छ ।’

घटना लगत्तै ठूलो मात्रामा युवाहरु यतिखेर जिल्ला प्रहरी कार्यालय बाँके पुगेकाछन् ।

चाडबाडलाई लक्षित गर्दै जिल्लामा शान्ति सुरक्षा कायम राख्न सुरक्षा सर्तकता अपनाएको जिल्ला प्रहरी कार्यालय बाँकेको समाचार प्रकाशन भएकै दिन युवामाथि आक्रमण भएको हो । थप विवरण आउन बाँकी...