नेपालगन्ज: बाँकेस्थित नेपालगन्ज कारागारमा ज्यान मार्ने उद्योगमा पुर्पक्षका लागि थुनामा रहेका व्यक्तिले कारागारबाटै मोटो रकम असुली धन्दा चलाएका छन् ।

कारगारमा जेल सजाय भोगिरहेका धनबहादुर सुनारले नेपालगन्जका केही व्यवसायीलाई धम्काउँदै मोटो रकम असुलीको धन्दा चलाईरहेको खुलेको छ ।

सुनारले यहाँका अधिकांश ट्राभल एजेन्सीबाट अनाधिकृत रकम असुल्दै आएको तथ्य फेला पारेको बाँके प्रहरी प्रमुख एसपी वीरबहादुर ओली बताउँछन् । बाँके प्रहरीले सुनारलाई रकम असुलीमा सहयोग गरेको आरोपमा एक व्यक्तिलाई पक्राउ गरी थप अनुसन्धान अघि बढाएको छ । यहाँ ट्राभल्स व्यवसायीले पनि सुनारले मागेअनुसारको रकम दिदैं आएको बुझिएको छ ।

अपहरण तथा ज्यान मार्ने उद्योगमा पुर्पक्षका लागि थुनामा रहेका धनबहादुर सुनारले कारागारभित्रैबाट धम्काई रकम असुल्न नेपालगन्ज–२ मा बस्दै आएका उनका २४ वर्षीय भतिजा युवराज सुनारलाई प्रयोग गरेको एसपी ओली बताउँछन् । प्रहरीले युवराजलाई नियन्त्रणमा लिएर अनुसन्धान थालेको छ ।

प्रहरी उपरीक्षक ओलीले सिम्ताली टुर्स एण्ड ट्राभल्स, पञ्चकोसी टुर्स एण्ड ट्राभल्स, देउती टुर्स एण्ड ट्राभल्स र नेपालगन्ज टुर्स एण्ड ट्राभल्सबाट सुनारले प्रति सवारीसाधन चार हजार आठ सयसम्म असुल्दै आएका थिए ।

सुनारको निर्देशनमा भतिजा युवराज सुनारले अढाई वर्षदेखि यसरी रकम असुली गर्दै आएका थिए । एसपी ओलीले भने –‘उनीहरूले अहिलेसम्म ‘१८–१९ लाख रुपैयाँ उठाएको प्रारम्भिक अनुसन्धानमा खुलेको छ ।’

सुनार २०७१ वैशाख १२ गते सुधीरसिंह ठकुरीमाथि कुटपिट गरेको, १२ पुसमा नेपालगन्जमा एक व्यक्तिलाई फोनमा ५ लाख फिरौती मागेका, र ३ पुस २०७४ मा नेपालगन्ज–१ का विशाल सुनारलाई खुडा प्रहार गरेको अभियोगमा पुर्पक्षका लागि थुनामा रहेका व्यक्ति भएको प्रहरी बताउँछ ।
नेपालगन्ज कारागारका जेलर भरत पाण्डेले उक्त घटनाबारे आफूलाई कुनै जानकारी नभएको बताएका छन् ।

सुनारले धम्काएको भरमा अढाई वर्षदेखि खुरूखुरू रकम बुझाउँने यहाँका टुर एण्ड ट्रार्भल्स एजेन्सीलाई पनि कानूनी दायरमा ल्याउनुपर्ने नागरिक अगुवाहरू बताउँछन् । चन्दा लिने मात्र होईन दिने पनि दोषी हो यसकारण उनीहरूमाथि पनि अनुसन्धान र कारबाही हुन जरूरी देखिएको नागरिक अगुवाहरूको भनाई छ ।