नेपालगन्ज: हिटर ताप्दा ८ भारतीय पर्यटकको मृत्यु भएकोछ ।  भारतको केरलाबाट मकवानपुरको दामन घुम्न आइपुगेका भारतीय २ परिवारका ८ सदस्यको मृत्यु भएको हो ।

उनीहरुको उपचारको क्रममा मृत्यु भएको प्रहरीले जनाएकोछ । बिहान ८ बजेसम्म पनि उनीहरु नउठेपछि समूहकै अन्य सदस्यले ढोका ढकढक गर्दा पनि खोलिएन । त्यसपछि उनीहरुले ढोका फोडी हेर्दा उनीहरु अचेत अवस्थामा भेटिएको पाइएको थियो ।

लगत्तै काठमाडौँबाट हेलिकप्टर मगाएर उनीहरुलाई उपचारका लागि काठमाडौंस्थित ह्याम्स अस्पतालमा लगिएको थियो । अचेत अवस्थामा भेटिएका ८ जनाको मृत्यु भइसकेको ह्याम्स अस्पताल श्रोतले बताएको छ ।

दामनको एभरेष्ट पानोरामा होटलमा मङ्गलबार राती ९ः३० बजे बास बस्न आइपुगेका १५ भारतीय पर्यटकले ४ वटा कोठा बुक गरेका थिए । जाडो बढेपछि भारतीय पर्यटकहरुले राति रेष्टुरेण्टमा प्रयोग हुने मसरुम ग्याँस हिटर आफ्नो कोठामा लगेका थिए ।

रेष्टुरेण्टका कामदारले लैजान नदिएपनि उनीहरुले बच्चालाई चिसो लाग्यो भनेर जबरजस्ती उक्त हिटर लिएर गएको बुझिएकोछ । त्यसपछि उनीहरु २ परिवारका सदस्यहरु एउटै कोठामा सुतेको पाइएकोछ । उनीहरुको नाम र ठेगाना खुलेको छैन ।