नेपालगन्ज : नेपालमा पहिलोपटक विदेशी नागरिकको कोरोनाका कारण मृत्यु भएकोछ । त्रिवि शिक्षण अस्पतालको आइसियुमा उपचाररत कोरोना संक्रमित एक चिनियाँ नागरिकको मृत्यु भएको हो ।

४८ वर्षीय महिलाको उपचारको क्रममा मृत्यु भएको अस्पतालका कोभिड फोकल पर्सन डाक्टर शन्तकुमार दासले जानकारी दिए । उनका अनुसार ती महिलामा मुटुको समस्या थियो ।

उनलाई श्वासप्रस्वासमा समस्या देखिएपछि उपचारका लागि पोखराबाट शुरुमा ग्राण्डी अस्पतालमा ल्याइएको थियो । ग्राण्डीबाट उनलाई थप उपचारका लागि त्रिवि शिक्षण अस्पतालमा रेफर गरिएको थियो ।

ती महिलाको स्वाब परीक्षणका क्रममा मंगलबार कोरोना पोजिटिभ देखिएको हो । उनको स्वास्थ्यमा समस्या बढ्दै गएपछि अस्पतालको आइसियुमा उपचार भइरहेको थियो । तर, बुधबार बिहान उपचारका क्रममा उनको मृत्यु भएको डाक्टर दासले बताए ।

नेपालमा कोरोना संक्रमित विदेशी नागरिकको मृत्यु भएको यो पहिलो हो ।