माथेवास (बाँके) : बाँकेको राप्तीसोनारी गाउँपालिका वडा नम्बर– २ माथेबासमा सोमबार ९३ जना नेपाली काँग्रेसमा प्रवेश गरेका छन् ।

नेपाली काँग्रेस राप्तीसोनारी वडा नम्वर– २ समितिले आयोजना गरेको पार्टी प्रवेश कार्यक्रममा विभिन्न पार्टी परित्याग गरि ९३ जना नेपाली काँग्रेसमा प्रवेश गरेका हुन् । नेपाली काँग्रेस बाँकेका उप–सभापति फुलाराम थारु, जिल्ला सचिव तप्त पौडेल, क्षेत्र नम्बर– १ का सभापति माधवराम खत्री लगायतले नव प्रवेशीलाई सदस्यता प्रदान गरि स्वागत गरेका थिए ।

पार्टी प्रवेश कार्यक्रममा बोल्दै प्रमुख अथिती थारुले नेपाली काँग्रेसको नीति, विचार र सिद्धान्तलाई मन पराएर पछिल्लो समय नेपाली काँग्रेसमा प्रवेश गर्नेको लहर बढेको बताए । उनले नेकपाको दुई तिहाई बहुमतको सरकार असफल भएको भन्दै यो सरकार भ्रष्टचार र आर्थिक अनियमितमा डुबेको बताए ।

कार्यक्रममा बोल्दै विशिष्ट अथिति समेत रहेका जिल्ला सचिव पौडेलले नेकपा सरकारले जनतालाई आश्वासन पूरा नगरेको बताउदै नेकपाको सरकारबाट जनतालाई न्याय नहुने धारणा राखे । त्यस्तै कार्यक्रममा बोल्दै विशिष्ट अथिति एवम क्षेत्रीय सभापति खत्रीले नेपाली काँग्रेसको नीति तथा सिद्धान्त र प्रतिबद्धताप्रति जनता आकर्षण हुन अहिले नागरिकको आशा र भरोसाको पार्टी नेपाली काँग्रेस नै भएको बताए ।

नेपाली काँग्रेस राप्तीसोनारीका सभापति भिमबहादुर रानाको सभापतित्वमा भएको कार्यक्रममा नेपाली काँग्रेसका महासमिति सदस्य भानुभक्त भट्टराई, संगिता चौधरी, क्षेत्रीय सचिव डिल्ली गिरी, जिल्ला सदस्य पवन शाह लगायत जिल्ला, क्षेत्र र स्थानीय नेता कार्यकताको उपस्थिती रहेको थियो । उक्त कार्यक्रम नेपाली काँग्रेस राप्तीसोनारीका सचिव तुलाराम खत्रीले सञ्चालन गरेका थिए ।