काठमाडौं : नेकपाका अध्यक्ष केपी शर्मा ओलीले केन्द्रीय सदस्यहरु थप गरेर बालुवाटारमा नै शपथ ग्रहण गराएका छन् । उनले हिजो थप गरेको भनिएका सदस्यहरुलाई आजको बैठकमा बोलाएका थिए । ४४७ जना मौजुदा सदस्यमा ५५६ जना थप गर्ने निर्णय गरेका थिए ।

आज उपस्थित भएका केन्द्रीय सदस्यहरुलाई शपथ ग्रहण गराइएको प्रधानमन्त्रीको प्रेस सल्लाहकारसमेत रहेका नेता सूर्य थापाले जानकारी दिए । ओलीले राखेको प्रस्ताव बैठकमा सर्वसम्मतले पारित गरेको थियो ।

यस्तै नेकपा (ओली समूह)को प्रवक्तामा प्रदीप ज्ञवाली चयन भएका छन् ।  बालुवाटारमा जारी ओली समूहको बैठकले प्रवक्तामा प्रदीप ज्ञवालीलाई चयन गरेको हो । बैठक अहिले पनि जारी छ । केन्द्रीय सदस्य कृष्ण राईका अनुसार पार्टी हितविपरीत काम गरेको भन्दै नारायणकाजी श्रेष्ठलाई प्रवक्ताबाट हटाएर ज्ञवालीलाई राखिएको हो ।

यसैबीच, नेकपाका दुई पक्षीय केन्द्रीय कमिटी बैठक गर्ने अवस्थामा पुगेको छ । प्रधानमन्त्री केपी शर्मा ओली पक्षको बैठक बालुवाटारमा चलिरहेको छ । भने, धुम्बाराहीस्थित पार्टीको केन्द्रीय कार्यालय बन्द गरिएकोछ ।

पार्टीको कचिङ्गलका कारण ओली पक्षले पार्टी कार्यालय सोमबार नै बन्द गराएको हो ।  सोमबार कार्यालय पुगेका कर्मचारीहरुलाई ओली निकट केन्द्रीय सदस्य तथा पार्टी कार्यालका सचिव ईश्वरी रिजालले कर्मचारीहरुलाई आफ्नै घरमा बस्न निर्देशन दिएको कर्मचारी चन्द्रदेव पासवानले जानकारी दिए । ‘पार्टी कार्यालयमा आउनुपर्दैन । तपाईँहरु आ–आफ्नो डेरामा गएर बस्नुस् भन्नुभएको छ । त्यसैअनुसार आज कार्यालय गएका छैनौँ,’ उनले भने ।

पूर्वमाओवादी निकट कार्यालय सचिव श्रीराम ढकालले भने आफू केही ढिलो गरी कार्यालय पुग्दा कर्मचारीहरुलाई बिदा दिइसकिएको जानकारी पाएको बताए । ‘कार्यालय सचिवले कार्यालय बन्द गरेर आ–आफ्नै डेरमा गएर बस्नु भन्नुभएछ । त्यसपछि उहाँहरु बन्द गरेर घर जानु भएछ,’ उनले भने ।

उनी अहिले केन्द्रीय कमिटी बैठकको तयारीमा पेरिसडाँडामा रहेको जानकारी दिए । ‘म परिसडाँडामा छु । यताको कार्यालय खुलेको छ । उताको जानकारी छैन,’ उनले भने । प्रचण्ड–नेपाल समूहले दिउँसो १ बजे बबरमहलमा रहेको कार्की ब्याङ्क्वेटमा बैठक बोलाएका छन् ।

पार्टी कार्यालय आफ्नो पक्षमा पार्ने द्वन्द्वका कारण कार्यालय बन्द गराइएको अर्का कर्मचारी सुनाउँछन् । पार्टी कार्यालयमा बैठक बोलाउन रोक्नका लागि कार्यलय बन्द गरिएको उनले बताए ।