नेपालगन्ज २२ माघ : नेकपा (प्रचण्ड–नेपाल) समुहले बिहीबार देशव्यापी गरेको आमहड्तालको बाँके र बर्दियामा सामान्य प्रभाव परेकोछ ।

प्रचण्ड–नेपाल समुहले गरेको देशब्यापी आमहड्तालले बाँके र बर्दियामा खासै प्रभाव पारेको छैन । यहाँ लामो दूरीको सवारी साधन चलेका छैनन भने छोटो दूरीका सवारी साधन निर्वाधरुपमा चलेकाछन् । हड्तालको प्रभावले बर्दियाको गुलरिया, भुरीगाँउ, बाँसगढी तथा बाँकेको खजुरा, नेपालगन्ज र कोहलपुर लगायतका क्षेत्रमा केही प्रभाव परेतापनि सर्वसाधरणको आवागमन निर्वाधरुपमा भएकोछ ।

प्रचण्ड–नेपाल समुहको हड्ताललाई लिएर दुवै जिल्लामा उच्च सुरक्षा सर्तकता अपनाइएको छ भने ठाँउ ठाउँमा नेपाल प्रहरी, सशस्त्र प्रहरीको बाक्लो उपस्थिती रहेकोछ ।प्रचण्ड–नेपाल समुहको केन्द्रीय संघर्ष समितिले बुधबार पत्रकार सम्मेलन गर्दै देशव्यापी आमहड्तालको घोषणा गरेको हो ।

सरकारले संविधानलाई बेवास्ता गर्दै संवैधानिक निकायहरुमा नियुक्ति गरेको भन्दै त्यसको विरोधमा बिहीबार देशव्यापी आम हड्तालसहित नयाँ संघर्षका कार्यक्रम घोषणा समेत गरेको छ ।

देशव्यापी आमहड्तालमा बिहीबार देशभर विभिन्न स्थानमा हालसम्म ९३ जना बन्दकर्ता पक्राउ परेका छन् । प्रहरीका अनुसार सबैभन्दा बढि काठमाडौँबाट ७६ जना, भक्तपुरबाट १ तथा तनहुँबाट १६ जना पक्राउ परिसकेका छन् ।

त्यस्तै, देशका विभिन्न स्थानमा सवारीसाधनमाथि अगजनी तथा तोडफोडका घटनाहरु भएका छन् ।