नेपालगन्ज १२ फागुन : सर्वोच्च अदालतले संसद पुनस्र्थापनाको फैसला गरेपछि प्रधानमन्त्री केपी शर्मा ओली नेतृत्वको नेपाल कम्युनिस्ट पार्टी (नेकपा) स्थायी समिति बैठक शुरु भएको छ । प्रधानमन्त्री निवास बालुवाटारमा स्थायी समिति बैठक शुरु भएको हो ।

सर्वोच्च अदालतले संसद पुनस्र्थापनाको फैसला गरेपछि बसेको बैठकमा समसामयिक राजनीतिक घटना क्रमबारे छलफल हुनेछ । संसद पुनस्र्थापछि बदलिएको राजनीतिक परिस्थितिको विषयमा बैठकमा छलफल हुनुका साथै बैठकले पार्टीको भावी रणनीति पनि तय गर्ने बुझिएको छ ।

सर्वोच्चले संसद विघटन गर्ने निर्णय बदर गरेसँगै नेकपाको प्रचण्ड–नेपाल पक्षले प्रधानमन्त्री ओलीले तत्काल राजीनामा दिनुपर्ने बताएको छ ।

प्रधानमन्त्री ओलीले राजीनामा नदिए संसद् अधिवेशन शुरु भएसँगै अविश्वास प्रस्तावमार्फत उनलाई हटाउने संकेत प्रचण्ड–नेपाल समूहले गरेको छ । प्रचण्ड–नेपाल पक्षले गत पुस ५ गते नै अविश्वास प्रस्ताव संसद् सचिवालयमा दर्ता गराएको थियो ।