नेपालगन्ज २३ फागुनः प्रतिनिधिसभाको सातौँ अधिवेशन शुरु भएको छ । राष्ट्रपति विद्यादेवी भण्डारीको आह्वानमा आईतबार साँझ नयाँ बानेश्वरस्थित संसद भवनमा बैठक शुरु भएको हो ।

सङ्घीय संसद्को वर्षे र हिउँदे अधिवेशनबीच छ महिनाभन्दा बढी समय खाली हुनु नहुने संवैधानिक व्यवस्था छ । प्रतिनिधिसभाको छैठौँ अधिवेशन गत असार १७ गते अन्त्य भएको थियो ।

नेपाल कम्युनिष्ट पार्टी (नेकपा)को आधिकारिकताबारे सर्वोच्च अदालतले फैसला गरेको तथा ओली र प्रचण्ड–नेपाल समूहबीचको विवादका रहेकै बेला भएको प्रतिनिधिसभा बैठकलाई महत्वका साथ हेरिएको छ । सर्वोच्चको फैसलाअनुसार नेकपाको आधिकारिकता ऋषि कट्टेल नेतृत्वको पार्टीले पाएका छन् ।

अहिले प्रतिनिधिसभामा सर्वोच्चले बदर गरेको नेकपाका सभामुखसहित १७३, नेपाली काँग्रेसका ६१, जनता समाजवादी पार्टी (जसपा)का ३२ सांसदको प्रतिनिधित्व छ ।
सरकारले पुस ५ मा प्रतिनिधि सभा विघटन गरे पनि सर्वोच्च अदालतले बदर गरिदिएपछि प्रतिनिधि सभा पुर्नस्थापना भएको थियो ।