नेपालगन्ज : बाँकेमा एक भारतीय नागरिक सहित तीन जनाको मृत्यु भएकोछ । बाँके प्रहरीका अनुसार छुट्टा–छुट्टै दुर्घटनामा उनीहरुको मृत्यु भएको हो । यसरी मृत्यु हुनेमा बाँकेको जनाकी गाउँपालिका–१ बरहैया गाउँमा शनिबार बिहान करेन्ट लागेर एक महिलाको मृत्यु भएको छ ।

जिल्ला प्रहरी कार्यालय बाँकेका प्रहरी नायव उपरीक्षक प्रकाश सापकोटाले दिएको जानकारी अनुसार आफ्नै घरमा कुचो लगाउदै गर्दा २० वर्षिया अनिता गुप्तालाई करेन्ट लागेर उनको मृत्यु भएको हो ।

स्थानीयका अनुसार मृतकका बुवाले अटो रिक्सा चार्ज गर्न जोडेको बेलामा आँगनमा कुचो लगाउदै गरेकी अनितालाई एक्कासी करेन्ट लागेको थियो ।

यसैबीच, बाँके राप्तीसोनारी गाँउपालिकाको बिनौना हरिहरपुर जोड्ने पुल निर्माणको कार्यमा खटेका एक भारतीय मजदुरको मृत्यु भएको छ ।

शुक्रबार साँझ ४ बजेतिर पुलको पिल्लर बनाउने क्रममा चोट लागेर गम्भीर घाइते भएका भारत पश्चिम बंगाल मालदाका १८ वर्षीय मरिउल स्लामको उपचारको क्रममा मृत्यु भएको बाँके प्रहरीले जनाएको छ ।

प्रहरीले मृतक दुवैको शव आवश्यक अनुसंधान पुरागरी अन्तिम संस्कारको लागि आफन्तको जिम्मा लगाएको छ ।

यस्तै शनिबार बाँकेको कोहलपुरस्थित डुडुवा नालामा डुबेर मुक्ति प्रसाद आचार्यको मृत्यु भएको छ । कोहलपुर निवासी २८ वर्षीय आचार्य पौडी खेल्न डुडुवा नालामा गएका उनको नालामा डुबेर मृत्यु भएको ईलाका प्रहरी कार्यालय कोहलपुरले जनाएको छ ।

कोहलपुर नगरपालिका १२ चपरगौडीस्थित डुडुवा पुल नजिक पौडी खेल्ने क्रममा आचार्य एक्कासी बेपत्ता भएका थिए । उनी डुबेको थाहा पाउनासाथ जनपथ प्रहरी र शसस्त्र प्रहरी उद्दारमा जुटेपनि जिवितै उद्धार गर्न नसकिएको कोहलपुर प्रहरीले बताएको छ ।