नेपालगन्ज १३ चैत्र : निर्वाचन आयोगले मतदाताको अन्तिम नामावली टुङ्गो लगाएको छ । आयोगको बैठकले एक करोड ७७ लाख बढि मतदाताको अन्तिम टुङ्गो लगाएको हो ।

आगामी वैशाख ३० गते हुने स्थानीय तह निर्वाचनमा एक करोड ७७ लाख ३३ हजार ७ सय २३ मतदाताले मत हाल्नेछन् । जसमध्ये ८९ लाख ९२ हजार १० पुरुष, ८७ लाख ४१ हजार ५३० महिला, र १८३ अन्य छन् ।

निर्वाचन आयोगका सहायक प्रवक्ता सूर्यप्रसाद अर्यालका अनुसार सबैभन्दा कम मतदाता मनाङमा रहेका छन् । मनाङमा ६ हजार ४ सय ९६ मतदाता रहेको आयोगले जनाएको छ । त्यस्तै, सबैभन्दा धेरै मोरङमा ७ लाख १५ हजार २२३ जना रहेको छन् ।

आयोगले एक साताअघि मतदाता नामावलीमा दाबी विरोधका लागि समय उपलब्ध गराएको थियो । आयोगले उक्त सूचनापछि सच्चाएर अन्तिम नामावली प्रकाशन गरेको हो ।

५ वर्षमा ३६ लाख मतदाता बढे

पाँच वर्षको अवधिमा ३६ लाख मतदाता बढेका छन् । २०७४ सालमा भएको स्थानीय तहको निर्वाचनमा एक करोड ४० लाख ७४ हजार चार सय २४ मतदाता थिए । यो पटक ३६ लाख ५९ हजार दुई सय ९९ सय बढेर १ करोड ७७ लाख पुगेको हो ।

निर्वाचन आयोगका सहायक प्रवक्ता एवम सूचना अधिकारी अर्यालका अनुसार सबै जिल्लाबाट मतदाताको संख्या संकलन गरेर त्यसउपर छलफल, दावी विरोध र सच्याउने अवसर दिएर मतदाताहरुको अन्तिम नामावली तय गरिएको हो ।

२०७४ सालकै प्रतिनिधिसभा र प्रदेशसभा निर्वाचनमा मतदाता संख्या एक करोड ५४ लाख थियो । प्रदेश र प्रतिनिधिसभाको निर्वाचन २०७४ को मंसिर १० गते र २१ गते भएको थियो ।

२०७४ सालमा प्रतिनिधिसभा र प्रदेश सभाको निर्वाचनको आधारमा भने २३ लाख मतदाता बढेका छन् ।

२१ हजार ९५५ वटा मतदाता केन्द्र

निर्वाचन आयोगले स्थानीय तह चुनावमा देशभर २१ हजार ९५५ वटा मतदात केन्द्र तोकिएको छ ।

निर्वाचन आयोगले एक सूचना निकालेर १० हजार ७५६ मतदान स्थलमा २१ हजार ९५५ वटा मतदात केन्द्र रहने जनाएको हो । एउटा मतदान स्थलमा एक भन्दा बढी केन्द्र पनि रहने छन् ।

सबैभन्दा धेरै मधेस प्रदेशमा ४ हजार १८९ मतदान केन्द्र रहने जनाएको छ । यस्तै सवैभन्दा कम कर्णाली प्रदेशमा एक हजार ३८५ वटा मतदान केन्द्र रहने छन् ।

बागमती प्रदेशमा ४ हजार ९५, प्रदेश १ मा ४ हजार ५१, लुम्बिनी प्रदेशमा ३ हजार ८३२, गण्डकी प्रदेशमा २ हजार ३०० र सुदूरपश्चिम प्रदेशमा २ हजार १०३ वटा मतदान केन्द्र रहने आयोगले जनाएको छ ।