नेपालगन्ज २४ चैत्र : राप्रपा नेपालका अध्यक्ष कमल थापाले आफ्नो पार्टी एमालेसंग तालमेल गरेर चुनावमा जाने बताएका छन् ।

पार्टीले नेपालगन्जमा आयोजना गरेको बृहत् कार्यकर्ता भेला एवं पार्टी प्रवेश कार्यक्रममा अध्यक्ष थापाले मुख्यरुपमा नेकपा एमालेसंग सहकार्य गरेर चुनावमा जाने बताएका हुन् ।

एमालेसँग चुनावी तालमेलका लागि कुराकानी भइरहेकाले सहमति भए सूर्यबाट चुनाव लड्ने उनले बताए ।

चुनावी तालमेलको मोडालिटीका बारेमा कुराकानी हुन बाँकी रहेको बताउँदै उनले आफ्नो पार्टी संगठन निर्माणकै चरणमा रहेकाले धेरै ठूलो महत्वाकांक्षा नरहेको स्पष्ट पारे ।

आफूहरूले एमालेसँग ठूलो भाग नखोजेको अध्यक्ष थापाको तर्क छ । ‘हामीले धेरै ठूलो माग गरेका छैनौँ । बाँकेको कुरा गर्ने हो भने नेपालगन्ज उपमहानगरपालिकामा उपमेयर र केही वडाध्यक्ष, कोहलपुर नगरपालिकामा पनि उपमेयर, केही वडाध्यक्षमा हाम्रो रुचि छ,’ अध्यक्ष थापाले अगाडी थपे, गाउँपालिकामा केही वडाध्यक्ष र सदस्यमा आशा गरेका छौं ।’

थापाले राजसंस्था बोकेर हिँड्दा हिन्दूराष्ट्र स्थापनाको मुद्दा नै कमजोर हुन थालेकाले राजसंस्थालाई छाडेको बताए ।

‘सबै दलको स्वीकार्य हुने गरी राजसंस्था पुनःस्थापनाको एजेण्डा बोकेको थिएँ । राजाले भने राजसंस्था पुनःस्थापनाका लागि कुनै सक्रियता देखाएनन्, उल्टै राजाले पटक–पटक पार्टीमा हस्तक्षेप गरे, थापाले भने, ‘राजाले पार्टीमा हस्तक्षेप गरिरहे । राजालाई बोकेर हिँड्दा हिन्दु राष्ट्रको एजेण्डा कमजोर हुने भयो ।’ थापाले माओवादीलाई समेत स्वीकार्य हुने राजसंस्था स्थापना गर्ने विषयमा आफू निरन्तर लागेको स्मरण गरे ।

यसैबीच, पार्टीले आयोजना गरेको कार्यक्रममा नेपालगन्ज उपमहानगरपालिका वडा नम्बर ५ र ८ का वडा अध्यक्ष राप्रपा नेपालमा प्रवेश गरेकाछन् ।

नेपालगन्जको यी दुवै वडा राप्रपाले जितेको वडा हो । वडा नम्बर –५ का अध्यक्ष कैफुलबरा जोलाह र वडा नम्बर–८ का अध्यक्ष सुरेन्द्र गुप्ता राप्रपा नेपालमा प्रवेश गरेको राप्रपा नेपालका केन्द्रिय सदस्य श्रीधर सुवेदीले जानकारी दिए ।

यी दुवै वडाध्यक्ष र केही युवालार्ई राप्रपा नेपालका अध्यक्ष कमल थापाले पार्टी प्रवेश गराएका थिए ।

राप्रपाका महामन्त्री समेत रहेका नेपालगन्ज उपमहानगरपालिकामा मेयर डाक्टर धवलशम्सेर राणा बाहेक राप्रपाले तीन वटा वडामा चुनाव जितेको थियो । त्यसमध्ये नेपालगन्ज उपमहानगरपालिका वडा नम्बर–४ का वडाअध्यक्ष मोहम्मद सफिक बेहना मेयर राणाका साथमा रहेकाछन् ।