नेपालगन्ज २९ चैत्र : नेपाली काँग्रेसका केन्द्रिय सदस्य एवम् पूर्व मन्त्री दीपक गिरीले स्थानीय आवश्यकता र औचित्यको आधारमा चुनावी तालमेल गर्ने भन्ने पार्टीको निर्णय अनुसार नै अघि बढ्नुपर्ने बताएका छन् ।

नेपाली काँग्रेसद्वारा देशब्यापीरुपमा आयोजित स्थानीय चुनाव लक्षित एक महिने ‘घर–घर जाऔं– काँग्रेस जिताऔं’ अभियानको आज बाँकेमा समापन गर्दै गिरीले स्थानीय अवस्था र आवश्यकतालाई मूल्यांकन गरेर चुनावी गठबन्धन गर्ने पार्टीको आधिकारिक निर्णय अनुसार नै अघि बढ्नुपर्ने बताए ।

केन्द्रिय प्रतिनिधिका रुपमा बाँके खटिएका गिरीले सत्ता साझेदार अन्य दललाई सम्मानजनक स्थान दिएपनि काँग्रेस बलियो भएको ठाउँमा अरुलाई छोड्न नसकिने बताए । उनले झिनामसिना कुरामा अल्झेर नबस्न आग्रह गर्दै एकता कायम गरेर अघि बढ्न नेता कार्यकर्तालाई आह्वान गरे ।

अर्का केन्द्रिय सदस्य एवम् पूर्व मन्त्री सञ्जय गौतमले स्थानीय तहका उम्मेदवार टुंग्याउने जिम्मा पार्टी विधान अनुसार नै दिनुपर्ने बताउँदै तालमेलको व्यवस्थापन स्थानीय तहबाटै हुनुपर्नेमा जोड दिए । गौतमले केन्द्रिय कार्यसमितिले गरेको निर्णय कार्यान्वयन हुने अवस्था बने आम कार्यकर्ताको भावनाको सम्मान हुने बताए । उनले पार्टीले तल्लो तहका कार्यकर्ताहरुको भावनाको सम्मान गर्नुपर्नेमा जोड दिए ।

समापन कार्यक्रमलाई सम्बोधन गर्दै अन्य बक्ताहरुले स्थानीय अवस्थालाई मध्यनजर गर्दै तालमेलको निर्णय गर्ने अधिकार सम्बन्धित तल्ला कमिटीलाई नदिए चुनावी गठबन्धन जोखिमपूर्ण हुने बताए ।

कार्यक्रममा बाँके काँग्रेस सभापति नारायण प्रसाद गौडेल, राष्ट्रिय सभा सदस्य एवम् पूर्व पार्टी सभापति युवराज शर्मा, पूर्व सभापतिहरु किरण कोइराला, गजेन्द्र हमाल, कृष्णमान श्रेष्ठ, प्रदेश प्रतिनिधिद्वय पुष्पलाल श्रेष्ठ र पुष्पा श्रेष्ठ, संविधानसभा सदस्य अब्दुल हमिद सिद्धिकी (भोला), महासमिति सदस्य फुलाराम थारु, क्षेत्र नम्बर–१ का क्षेत्रीय सभापति पोषण केसी, क्षेत्र नम्बर–२ का सभापति रमेश कुमार गुप्ता, क्षेत्र नम्बर– ३ का सभापति नक्की खाँ, क्षेत्र नम्बर– १ का निवर्तमान सभापति माधवराम खत्री, महाधिवेशन प्रतिनिधि सुदीपनरसिंह राणा, प्रदेश २ (क) का सभापति ज्ञानेन्द्र कुमार चौधरी, ३ (ख) का सभापति राजेन्द्र आचार्य, नेपालगन्ज नगर सभापति प्रशान्त विष्ट, राप्तीसोनारी सभापति भिम बहादुर राना क्षेत्री र नेविसंघका अध्यक्ष पूर्ण आचार्यले बोलेका थिए ।

समापन कार्यक्रम सभापति गौडेलको सभापतित्वमा सम्पन्न भएको थियो । उपसभापति कृष्ण बहादुर कार्कीले स्वागत मन्तब्य व्यक्त गरेको कार्यक्रमको सञ्चालन सचिव सञ्जु कुमारी थारुले गरेकी थिइन् । कार्यक्रममा नेपालगन्जका सन्तोष गुप्ता र सोनाली गुप्तालाई केन्द्रिय सदस्य गिरीले पार्टी प्रवेश गराएका थिए ।