नेपालगन्ज ६ बैशाख : नेपाली सेनाका पूर्व जर्नेल दीप्तप्रकाश शाहको मंगलबार पशुपति आर्यघाटमा अन्त्येष्टि गरिएको छ । नेपाली सेनाले शाहलाई सलामी दिएर अन्तिम बिदाइ गरेको छ । उनी दुल्लुका अन्तिम राजा जङ्गबहादुर शाहका साहिँला छोरा हुन् ।
शाहको ८६ वर्षको उमेरमा हृदयाघातबाट सोमबार साँझ काठमाडौंको हिमाल अस्पतालमा निधन भएको थियो । सोमबार साँझ ७ः३० बजे उनलाई एक्कासि श्वास प्रश्वासमा समस्या आएपछि उनका छोरा सत्यम शाहले हिमाल अस्पतालको आकस्मिक कक्षमा भर्ना गरेका थिए ।
‘बुवाको स्वास्थ्य अवस्था सामान्य थियो’, छोरा सत्यमले भने, ‘बेलुका ६ बजे मैले बुबालाई कस्तो छ भनी सोधेको थिए । उहाँले ठिक छ भन्नुभयो । साँझ ६ः३० बजे कामले बाहिर निस्केको थिए । एक छिनपछि आमाले फोन गरेर घरमा बोलाउनुभयो । बुवालाई श्वास फेर्न गाह्रो भएपछि तत्काल अस्पताल लगे ।’
कुनै दीर्घ रोग नभएका शाहको हिमाल अस्पतालमा उपचारका क्रममा निधन भएको हो । अस्पतालको आकस्मिक कक्षसम्म शाह हिँडेर नै गएका थिए । ‘बुबालाई कुनै रोगले च्यापेको थिएन । डाक्टरहरूले धेरै प्रयास गरे तर बेलुका ९ बजे तिर बुवा बित्नुभयो । हिमालमा राख्ने ठाउँ नभएकाले सोमबार बेलुकै छाउनी स्थित नेपाली सेनाको अस्पतालमा लगियो ।’
नेपाली सेनाको उपरथीबाट अवकाशप्राप्त दीप्त प्रकाश शाह तत्कालीन राजा ज्ञानेन्द्र शाहको पालामा राष्ट्रियसभाको सांसदमा मनोनीत भएका थिए । तर, राजाबाटै मनोनीत रमेशनाथ पाण्डेको बारेमा गरेको टिप्पणीपछि दरबारको दबाबमा उनले सांसद पदबाट राजीनामा दिएका थिए ।
तत्कालीन राजा ज्ञानेन्द्रले शासन सत्ता हातमा लिएका बेला दीप्तप्रकाश शाह सर्वाधिक चर्चित र प्रभावशाली व्यक्ति थिए ।
बेलायतमा कानून विषयको अध्ययनपछि नेपालमा फर्किएर उनी तत्कालीन शाही नेपाली सेनामा भर्ती भएका थिए । शाह दुल्लुका अन्तिम राजा जङ्गबहादुर शाहका छोरा भएकाले यदि राजा प्रथाको अन्त्य भएको थिएन भने उनी दुल्लुका राजा बन्ने लाइनमा थिए ।
सेनामा जागिर खाएकै बेला नेपाली काँग्रेसबाट चुनाव लड्न शाह दुल्लु गएका थिए । तर, अन्तिममा गिरिजाप्रसाद कोइरालाबाट धोका भएपछि उनी स्वतन्त्र उम्मेदवारबाट चुनावमा उठेका थिए । तर, चुनावमा उनी विजयी हुन सकेनन् ।
शाहका एक छोरा, दुई छोरी र श्रीमती छन् । दाहसंस्कारअघि शाहको पार्थिव शरीर श्रद्धाञ्जलीका लागि गैरीधारास्थित निवासमा राखिएको थियो ।