बाँके(राप्तीसोनारी) १२ वैशाख : राप्तीसोनारी गाउँपालिकाको ९ वटै वडामा मनोमानी तरिकाले टिकट वितरण गरेको भन्दै काँग्रेस नेतृ संगिता थारुले उपाध्यक्षको टिकट फिर्ता गरेकी छन् ।

राप्तीसोनारीका ९ वटै वडामा काँग्रेस बाँके क्षेत्र नम्बर–१ ले वडाअध्यक्ष र वडासदस्यका लागि टिकट वितरण गरेको थियो ।

नेपाली काँग्रेस जिल्ला र क्षेत्र नम्बर– १ क्षेत्रीय कार्यसमितिले मनोमानी तरिकाले राप्तीसोनारी गाउँपालिकाको–९ वटै वडामा टिकट वितरण गरेकाले काँग्रेसमा असन्तुष्टी भएको उनको भनाई छ ।

असन्तुष्टीले काँग्रेसको जित्ने आधार नहुँदा र टिकट वितरणमा मनोमानीले काँग्रेसका विभिन्न ब्यक्तिले पार्टी परित्याग गरी राप्रपाबाट उम्मेदवारी दर्ता गराउनुका साथै धेरै ब्यक्तिले बागी उम्मेदवारी दर्ता गराएकाले आफ्नो उम्मेदवारी फिर्ता लिएको नेतृ संगिताले विज्ञप्तीमार्फत प्रष्ट्याएकी छन् ।

उनी नेपाली काँग्रेस बाँके क्षेत्र नम्बर– १ बाट पार्टीको महाधिवेशन प्रतिनिधी छिन् । यही बैशाख ३० गते हुन लागेको आसन्न स्थानीय तहको निर्वाचनका लागि नेपाली काँग्रेस राप्ती सोनारी गाउँपालिका कार्यसमितिबाट उनको नाम गाउँपालिका अध्यक्षमा सिफारिस भएको थियो । तर, काँग्रेस जिल्ला कार्यसमिति संसदिय दलले आईतबार बेलुका संगितालाई राप्तीसोनारी गाउँपालिका उपाध्यक्षको टिकट दिने निर्णय गरेको थियो ।