नेपालगन्ज २३ वैशाखः २०५४ सालमा तत्कालिन होलिया गाविसको अध्यक्ष निर्वाचित भएर उदाहरणीय काम गरेकी सरोजकुमारी यादव स्थानीय निर्वाचनमा डुडुवा गाउँपालिकाको अध्यक्ष पदकी उम्मेदवार दिइ मतदाता माझ बिजयको मत मागिरहेकी छन् ।

नेकपा एमालेको तर्फबाट यादव अध्यक्ष र युवा नेता शकील खान उपाध्यक्ष पदका उम्मेदवार हुन् । यसअघि अध्यक्ष पदको उम्मेदवार रहेका खान आफै अग्रसर भई महिला नेतृ यादवलाई पालिका अध्यक्ष उठाउनुमा रणनीतिक महत्व रहेको छ ।

एमाले डुडुवाका कमिटिका अध्यक्ष समेत रहेका खानले यादव परिवार जोडिएपछि डुडुवामा एमाले बलियो भएको बताए ।

उनी भन्छन्–‘डुडुवामा एमालेले सरकार बनाउँछ । जनताले हामीलाई जिताउँछन् ।’ सरोजकुमारीसंग आफैमा राजनीतिक निर्णय गर्ने सार्मथ्य छ।

सरोजकुमारी गाउँका जस्तासुकै ठुला बिवादहरु आफै अग्रसर भएर मिलाउन सक्ने क्षमता राख्ने गरेकी छन् । २०५४ सालमा होलिया जस्तो बिकट गाविसको अध्यक्ष भएकी उनी अब भने अत्यन्त शक्तिशाली मानिने स्थानीय तहको प्रमुख बन्ने तयारीमा छिन् । त्यसका लागि गाउँ–गाउँमा मत मागिरहेकी यादव जित्ने ढुक्क छिन् ।