खजुरा(बाँके) २४ वैशाख : बाँकेको खजुरा गाउँपालिकामा स्थानीय तह निर्वाचनका लागि लोकतान्त्रिक बाम गठबन्धनबाट नेपाली काँग्रेसको तर्फबाट उपाध्यक्ष पदका उम्मेदवार मञ्जु मल्लप्रतिको जनलहर बढ्दै गएको छ ।

स्थानीय निर्वाचान आउन ६ दिन बाँकी रहँदा पालिकामा जितका लागि गठबन्धनतर्फबाट तीव्र प्रचारप्रसारसहित घरदैलो कार्यक्रमहरु भई रहँदा मल्लप्रति मतदाताहरुको रुझान देखिएको हो ।

स्थानीय निर्वाचन २०७४ मा दोस्रो भएको नेकपा माओवादी केन्द्र र तेस्रो भएको नेपाली काँग्रेसले संयुुक्त भएर वैशाख ३० गते हुने निर्वाचनका लागि अन्य पार्टीका उम्मेदवारसँग प्रतिस्पर्धा गर्दैगर्दा खजुरामा गठबन्धन बलियो भएको खजुराबासीको आँकलन रहेको छ । जसमा बलियो उम्मेदवारको रुपमा उपाध्यक्ष पदकी उम्मेदवार मल्लको चर्चा चुलिँदै गएको छ ।

मल्लको उम्मेदवारी बलियो हुनुमा गठबन्धनसँगै उनको व्यक्तिगत स्वभाव पनि हो । सरल स्वभावकी मल्ल मिलनसार र उनले अग्रजहरुलाई दिने सम्मानले उनी लोकप्रिय बन्दै गएकी हुन् ।

चुनावी प्रचारप्रसारमा खजुराका सबै वडामा घरदैलो गरिरहँदा उनले जनतासँग आफ्नो लागि भोट माग्नुभन्दा जनताका समस्या के छन् ? भनी बढी साध्ने गरेकीछन् । खजुराबासीसँग भोट माग्दै गर्दा अरुलाई गाली गर्नु भन्दा आफूले के गर्न सकिन्छ ? भन्ने कुरामा आफुले जोड दिने गरेको उनको भनाइ छ ।

‘खजुरा गाउँपालिकाको विकासका लागि सबै खजुराबासीको ठूलो सहयोग रहेको छ, उनले भनिन्–‘चाहे त्यो खजुरामा क्यान्सर अस्पताल बनाउन होस् वा कुनै अरु कामहरु । खजुराम विकासका कामहरु हुँदै गर्दा हाम्रा जनप्रतिनिधिले कति गुणस्तरीय काम गरे भनेर नियाल्न पनि जरुरी रहेको छ । मेरो उम्मेवारी भनेको खजुरामा हुने हरेक कामलाई गुणस्तरीय बनाउनु हो ।’ मल्ल पालिकामा हुने सडक पूर्वाधारदेखि सामाजिक कामहरुलाई गुणस्तरीय बनाउन जोड दिन्छिन् ।

खजुरा सामाजिक हिसाबले विभिन्न धर्मका मानिसहरुको बसोबास भएको स्थान हो । विशेषगरी हिन्दू र मुस्लिम समुदायको बाहुल्यता रहेको खजुरामा सामाजिक सद्भाव र समावेशी तरिकाले बसोबास गरेका गाउँहरु धेरै रहेका छन् ।

उपाध्यक्षकी उम्मेदवार मल्ल खजुरामा भएका सबै धर्मका व्यक्तिहरुलाई प्रतिनिधित्व हुने उम्मेवारका रुपमा पनि परिचित छिन् । सामान्य घरपरिवारबाट प्रतिनिधित्व गरेकी मल्लको राजनीतिक यात्रा गाउँदेखि सहरसम्म चुलिएको छ ।

मानिसका दुःख, पीडा, आवश्यकता, सामाजिक परिवर्तन, जनताका हकअधिकारलाई नजिकदेखि बुझेकी मल्लको खजुरा गाउँपालिकाको उपाध्यक्षमा उम्मेदवारी सार्थक नै देखिन्छ ।

मल्ल पालिकामा रहेका हरेक जनताले स्थानीय सरकारबाट पाउनु पर्ने सेवासुविधा समान पाउनु पर्ने धारणा राख्छिन् । उनी भन्छिन्–‘पालिकाले जनतालाई दिनुपर्ने हरेक सेवा सुविधामा जनताको पहुँच हुनुपर्छ । सबैलाई समान व्यवहार गर्नु पर्छ । तर, कतिपय अवस्थामा मानिसका अति आवश्यक कुराहरुलाई मध्यनजर गरेर पनि काम गर्नु पर्ने हुन्छ ।’

मल्लले खजुरामा अझैँ पनि सहयोग दिने विषयमा आ–आफ्ना नजिकका मान्छे हेर्ने कू–संस्कार रहेको बताउछिन् । उनी जनतालाई हेर्ने दृष्टिकोणमा जनप्रतिनिधिको समानता हुनुका साथै पालिकाको विकासका लागि दीर्घकालीन योजना र जनताको स्तरोन्नतिका लागि आफूले निर्वाचित भएपछि काम गर्ने बताउछिन् । काम गर्नका लागि भिजन र मिसन हुनु पर्नेमा उनको स्पष्ट दृष्टिकोण रहेकोछ ।