आईतबार, असार १९, २०७९   ०१:३१:४७

स्थानीय चुनावमा एमालेमाथि राज्यका निकायबाट ठाडो हस्तक्षेप भयो : एमाले बाँके


सेतोखरी   2079-03-05

नेपालगन्ज ५ असार : स्थानीय तहको निर्वाचमा राज्यका निकायबाट एमालेमाथि ठाडो हस्तक्षेप भएको नेकपा एमाले बाँकेले आरोप लगाएकोछ । स्थानीय तहको निर्वाचनमा बाँकेका प्रमुख निर्वाचन अधिकृत, जिल्ला प्रहरी प्रमुख लगायतका राज्यका निकायबाट एमालेमाथि ठाडो हस्तक्षेप भएको एमालेले आरोप लगाएको हो ।

निर्वाचन सम्पन्न भएको एक महिनापछि बसेको पार्टीको चौथो पूर्ण बैठकको निर्णयबारे जानकारी दिन आईतबार आयोजित पत्रकार भेटघाटमा एमाले नेताले यस्तो आरोप लगाएका हुन् ।

‘नेपालगन्ज उपमहानगरपालिका वडा नम्बर १७ का हाम्रो पार्टीका वडाअध्यक्षका उम्मेदवार अजय पाठकको उम्मेदवारी खारेजी गर्नु नै असहयोगको एउटा उदाहरण हो,’ एमाले बाँकेका अध्यक्ष किस्मतकुमार कक्षपतिले पत्रकार सम्मेलनमा निर्धक्कसंग बताए ।

उनले खजुरा गाउँपालिका वडा नम्बर–४ को निर्वाचन परिणाम र नेपालगन्ज–१८ मा एमालेका उम्मेदवार निर्वाचित भएको ८ घण्टापछि मात्र परिणाम घोषणा गर्नुले शंका उत्पन्न गराएको बताए ।

स्थानीय तहको निर्वाचनका बेला राज्यका निकायबाट ठाडो हस्तक्षेपको विरोध गर्दै उनले स्थानीय प्रशासनबाट आफ्ना पार्टीका नेता तथा कार्यकर्तामाथिको धरपकड तत्काल बन्द गर्न माग गरे । पार्टीको चौथो पूर्ण बैठकबाट नेकपा एमाले, बाँकेले विभिन्न ११ बुँदे सवाल उठाउँदै तत्काल समाधान गर्न सरकारसँग माग गरेको छ ।

एमालेले आफूले उठाएको मुद्दाको समाधान नभए आन्दोलन गर्ने चेतावनी समेत दिएको छ ।

यस्तै किसानका लागि तत्काल सस्तो, सहज रुपमा धानको बीउ उपलब्ध गराउन स्थानीय निकाय र सरोकारवालासँग एमालेले माग गरेको छ ।

किसानका लागि अति आवश्यकीय मल उपलब्ध गराउन सरकारसँग एमालेको जोडदार माग छ । किसानले खरिद गरेको मललाई स्थानीय प्रशासनले गर्ने धर पकड र दुब्र्यवहार तत्काल बन्द गर्न आग्रह गरेको छ ।

गतवर्ष बेमौसमी वर्षाका कारण धानबालीको क्षति व्यहोरेका किसानलाई एक हप्ताभित्र राहत रकम दिन, कृषि सिचाइँका लागि नियमित रुपमा बिद्युत आपुर्ती गर्नुका साथै लोडसेडिङ बन्द गर्न माग गरिएको छ ।
यस्तै पेट्रोलियम पदार्थलगायत दैनिक उपभोग्य बस्तुको मूल्य फिर्ता गर्न, एसपीपी सम्झौता नगर्न र अर्थमन्त्रीको राजीनामा समेत माग गरेकोछ ।

बाँके जिल्लाका सबै स्थानीय तहले नीति कार्यक्रम र बजेट विनियोजन गर्दा श्रमजिवी, गरिब, विपन्न, दलित, मुस्लिम, आदीवासी जनजाती र मधेसीलाई प्रमुख प्राथमिकता दिनुपर्ने सुझाव दिएको छ ।

पत्रकार भेटघाटमा एमालेका केन्द्रिय सदस्य एवम् बाँके इन्चार्ज सूर्य ढकाल, केन्द्रिय सदस्य एवम् बाँके सह–इन्चार्जद्वय मोहम्मद हारुन र दीपा शर्मा, लुम्बिनी प्रदेश सदस्य शिव डोटेल, जिल्ला उपाध्यक्ष डिल्ली बिसी, सचिव रत्न खत्री लगायतको उपस्थिती रहेको थियो ।

यसैबीच किसानलाई अविलम्ब मल, बीउ उपलब्ध गराउने भन्दै असार १२ गते ११ बजे जिल्ला प्रशासन कार्यालय बाँकेमा धर्ना दिने कार्यक्रम तय भएको एमाले बाँकेका सचिव रत्न खत्रीले जानकारी दिए ।