नेपालगन्ज १९ साउन : नेपालगन्ज उप–महानगरपालिकामा कार्यरत कर्मचारीहरु एकसाथ ठुलो सङ्ख्यामा अनुपस्थित भएको पाइएको छ । अनुपस्थित रहने कर्मचारीहरुमा शाखा प्रमुखको जिम्मेवारीमा रहेका अधिकृतस्तरका कर्मचारी धेरै पाइएको छ ।

नेपालगन्ज उपमहानगरपालिकाका प्रमुख प्रशान्त विष्ट, उपप्रमुख कमरुद्दिन राई र निमित्त प्रमुख प्रशासकीय अधिकृत गोर्खबहादुर थापाले बिहीबार उप–महानगरपालिका कार्यालयमा कर्मचारीहरुको हाजिरी छड्के अनुगमन गरेका हुन् ।

अनुगमन गर्दा शाखा अधिकृतसहित ३२ जना कर्मचारीहरुले हाजिरी नगरेको पाइएको हो । यद्यपी शाखा अधिकृत को–को हुन् भन्ने बारे उपमहानगरले नाम खुलाएको छैन ।

नगरप्रमुख विष्टका अनुसार विहान १०.२० बजे हाजिरी रजिष्ट्रर छड्के गर्दा १२ जना अधिकृतस्तरका कर्मचारीहरु अनुपस्थित पाइएको हो । उनीहरु मध्ये अधिकांश शाखा प्रमुखको जिम्मेवारीमा समेत छन् । यसैगरी पाँचौं तहका ७ जना र करार १३ जना कर्मचारी पनि अनुपस्थित पाइएको हो ।

नगरप्रमुख विष्ट सहितको टोलीले दैनिक समयमै कार्यालयमा उपस्थित रहन र समयभित्रै उपस्थिती जनाउन निर्देशन दिएको छ । पहिलो चरणमा हाजिरी छड्के गरेको नगरप्रमुख विष्ट सहितको टोलीले सेवा प्रवाह लगायतका विषयमा पनि निरन्तर अनुगमन गर्ने जनाएको छ ।

नगरभित्रका सामुदायिक विद्यालयका शिक्षकहरुको हाजिरी रजिष्ट्ररको अनुगमन गरिरहेको नगरपालिकाको टोलीले बिहीबार आकस्मिक रुपमा कर्मचारीको पनि हाजिरीको अनुगमन गरेको हो ।