नेपालगन्ज: लगातारको अविरल वर्षापछि आएको बाढी र पहिरोका कारण मृत्यु हुनेको संख्या ३० पुगेको छ । बाढी र पहिरोका कारण १२ जना घाईते हुनुका साथै १८ जना बेपत्ता भएका छन् ।

बाढी पहिरोमा परी ललितपुरमा सबैभन्दा धेरै ५ जनाको मृत्यु भएको छ । काठमाडौं, खोटाङ र काभ्रेमा ३/३ जना, भोजपुर, मकवानपुर, धादिङ र सिन्धुलीमा २/२ जना तथा पाँचथर, ओखलढुंगा, पर्सा, रामेछाप, ईलाम, झापा, सुनसरी, बारा र चितवनमा १/१ जना गरी ३० जनाको ज्यान गएको पाइएकोहो ।

यस्तै मकवानपुरमा ४ जना, काभ्रेमा २ जना तथा खोटाङ, रामेछाप, धादिङ, दोलखा, सुनसरीमा र चितवन १÷१ जना गरी १२ जना घाइते भएका हुन् । सिन्धुलीमा ४ जना, भोजपुरमा ३ जना तथा काठमाडौं, ललितपुर, पाँचथर, झापा, उदयपुर, मोरङ, सुनसरी, महोत्तरी, रौतहट, पर्सा धादिङमा १÷१ जना गरी १८ जना वेपत्ता भएका छन् ।

बाढी पहिरोमा परेका काठमाडौंमा ४२ जना, उदयपुरमा १० जना, ललितपुरमा ३ जना, सिन्धुलीमा ४ जना, सिराहमा २ जना, भक्तपुर, सुनसरी र मकवानपुरमा १/१ जना गरी ६४ जनाको सकुशल उद्दार गरिएको नेपाल प्रहरीले जनाएको छ ।

सरकारले बाढी र पहिरो प्रभावितको उद्धार तथा राहत वितरणमा २७ हजार प्रहरी परिचालन गरेको छ । प्रहरी प्रधान कार्यालयका अनुसार २७ हजार ८ सय ३० प्रहरी परिचालन गरिएको हो ।

बाढी र पहिरोले आफ्नै बास समेत गुमाएका प्रहरीसमेत उद्धार र राहत वितरणमा खटिएको प्रहरीले जनाएको छ । बाढी तथा पहिरो गएका सम्पूर्ण क्षेत्रमा आवश्यक स्रोतसाधन परिचालित गरि उद्धार कार्य भइरहेको प्रहरीले जनाएको छ ।

लगातारको वर्षाका कारण तराइका विभिन्न जिल्ला डुवानमा परेका छन् । भने सडकको अवस्था जानकारी लिएर मात्रै बाहिर निष्किन प्रहरीले सबैसँग आग्रह गरेको छ ।

अविरल वर्षापछि आएको बाढीले पुल बगाउँदा पूर्वपश्चिम राजमार्ग पूर्णरुपमा अवरुद्ध भएको छ । पूर्वपश्चिम राजमार्ग अन्तर्गत महोत्तरी बर्दिवास नगरपालिकास्थित भप्सी पुल बाढीले बगाएको हो । पुलको बीच भाग नै भत्किएपछि आवत–जावत ठप्प छ ।

पुल भत्किएपछि बर्दिवास नगरपालिका ५ सशस्त्र प्रहरीको माइस्थान चेकपोष्टतर्फ र रातुखोलातर्फ सयौं गाडीहरु रोकिएका छन् । रातिदेखि नै यात्रुहरु सडकमा अलपत्र छन् । कतिपय यात्रुहरु भने जोखिम मोलेर खोलाको बाढी तरेर वारपार गरेका छन् ।